సుదీర్ఘ విరామం త‌ర‌వాత ప‌వ‌న్ చేస్తున్న సినిమా 'వ‌కీల్ సాబ్'. కాబ‌ట్టి అంచ‌నాలు ఆకాశంలో ఉన్నాయి. ఏప్రిల్ 9న విడుద‌ల చేస్తున్నారు. ఈరోజు ట్రైల‌ర్ విడుదలయ్యింది. అందులో కోర్టు హాలులో ప‌వ‌న్ క‌ల్యాణ్ విజృంభ‌ణ క‌నిపించింది. మీరు వర్జినా.. అని అమ్మాయిలను అడగొచ్చు.. మేం అబ్బాయిలను అడగొద్దా’ అంటూ కోర్టులో పవర్‌స్టార్ గ‌ర్జిస్తూ క‌నిపించాడు. ఆయా స‌న్నివేశాలు ప‌వ‌న్ క‌ల్యాణ్ ఫ్యాన్స్‌కు త‌ప్ప‌కుండా న‌చ్చుతాయ‌నిపిస్తోంది. బాలీవుడ్ లో ఘ‌న విజ‌యం సాధించిన 'పింక్‌' కి రీమేక్ ఇది. అమితాబ్ పాత్ర‌లో ప‌వ‌న్ ఎంత వ‌ర‌కూ న్యాయం చేస్తాడు? అనే సందేహాలు ట్రైల‌ర్ తో ప‌టాపంచ‌లైపోయాయి. అమితాబ్ ని ఎక్క‌డా ఫాలో అవ్వ‌కుండా, త‌న‌దైన ముద్ర వేయ‌డానికి ప‌వ‌న్ ప్ర‌య‌త్నించాడు. 

అంజలి, నివేదా థామస్, అనన్య నాగళ్ల కీలక పాత్రధారులుగా న‌టించారు. ఓ కేసులో నలిగిపోతున్న ఈ ముగ్గురు అమ్మాయిల్ని వ‌కీల్ సాబ్ ఎలా కాపాడాడు? అనేది తెర‌పై చూడొచ్చు. త‌మ‌న్ బీజియ‌మ్స్‌, ప‌వ‌న్ క‌ల్యాణ్ ఎలివేష‌న్లూ అదిరిపోయాయి. అయితే శ్రుతిహాస‌న్ ఎక్క‌డా క‌నిపించ‌లేదు. థియేట‌ర్లోనే త‌న‌ని చూడాలేమో..? మొత్తానికి పింక్ రీమేక్ ని ప‌వ‌న్ క్రేజ్‌కి త‌గినట్టు మార్పులు చేసిన‌ట్టు స్ప‌ష్టంగా కనిపిస్తోంది.