ఆపద సమయాల్లో తమ అభిమానులను ఆదుకోవటమే కాకుండా 'మేము సైతం' అంటూ తమ వంతు సాయం చేయటానికి ముందుకొస్తారు సినీతారలు. కోవిడ్ సమయంలో సోనూసూద్ చేస్తున్న సామాజిక కార్యక్రమాలు ఆయన్ను ఒక రోల్ మోడల్ గా చేసేసింది. అదే కోవలో 'ఇస్మార్ట్ శంకర్' భామ నిధి అగర్వాల్ కూడా తన వంతు సాయం అందించేందుకు ముందుకొచ్చింది.

నటి నిధి అగర్వాల్ 'డిస్ట్రిబ్యూట్ లవ్' అనే స్వచ్ఛంద సంస్థను ప్రారంభించటానికి సన్నద్ధమవుతోంది. ఇది కోవిడ్ సంబంధిత అన్ని అవసరాలకు తీర్చే ఒక గమ్యస్థానంగా ఉండనుంది. ఈ వెబ్‌సైట్ ద్వారా వచ్చే ప్రతి అభ్యర్థనను పరిశీలించడానికి ఒక బృందాన్ని కూడా ఏర్పాటు చేసినట్లు నటి తెలిపింది.

“నేను స్వచ్ఛంద సంస్థను ప్రారంభిస్తున్నాను. దీనిని 'డిస్ట్రిబ్యూట్ లవ్' అని పిలుస్తాము. ఇది ముఖ్యంగా కోవిడ్ కోసం. ప్రజలు, కోవిడ్ సంబంధిత ప్రాధమిక అవసరాలు, మందులు లేదా వారికి అవసరమైనది ఏదైనా అభ్యర్థనలను ఈ వెబ్‌సైట్ లో తెలియజేస్తే, వారికి సాయం అందించేందుకు మా బృందం సిద్ధంగా ఉన్నారు." అని ఆమె మీడియాకు వివరించారు.