యూఏఈ: ఏ నేరంలోనైనా నిందితులుగా అరెస్టైన వ్యక్తులు పారిపోవటానికి ప్రయత్నిస్తే అదనపు జైలు శిక్ష ఎదుర్కొవాల్సి వస్తుందని యూఏఈ పబ్లిక్ ప్రాసిక్యూషన్ హెచ్చరించింది. అరెస్టు సమయంలో పారిపోయినా, పోలీసుల అదుపులో నుంచి తప్పించుకున్నా రెండేళ్ల వరకు జైలు శిక్ష విధించనున్నట్లు వెల్లడించింది.దీంతో పాటు కస్టడీకి కూడా అప్పగించేందుకు అవకాశాలు ఉంటాయని తెలిపింది. ఈ మేరకు యూఏఈ పబ్లిక్ ప్రాసిక్యూషన్ ఒక వీడియోను విడుదల చేసింది. ఇద్దరు లేదా అంతకుమించి వ్యక్తులు నేరానికి పాల్పడినప్పుడు, బెదిరింపులు, విధ్వంసాలకు పాల్పడిన కేసుల్లో పెనాల్టి జైలు శిక్ష రూపంలో ఉంటుందని స్పష్టం చేసింది.నేర తీవ్రత, ఉపయోగించిన ఆయుధాలను బట్టి ఐదేళ్లకు మించకుండా జైలు శిక్ష విధించనున్నట్లు హెచ్చరించింది.