కువైట్ సిటీ: రెండో డోస్ వ్యాక్సినేషన్ కోసం ఎదురుచూస్తున్నవారిని ఉద్దేశించి హెల్త్ మినిస్టర్ ఓ కీలక ప్రకటన చేశారు. వ్యాక్సిన్లు వచ్చిన 10 రోజుల్లోనే రెండో డోస్ కోసం ఎదురుచూస్తున్నవారందరికీ వ్యాక్సినేషన్ పూర్తి చేయడం జరుగుతుందని హెల్త్ మినిస్టర్ షేక్ డాక్టర్ బాసిల్ అల్ సబా చెప్పారు. 30 కేంద్రాల్లో ఈ మేరకు వ్యాక్సినేషన్ కోసం ఏర్పాట్లు పూర్తయ్యాయని తెలిపారాయన. ఆక్స్‌ఫర్డ్ వ్యాక్సిన్ రావడంలో ఆలస్యం వల్లే సమస్య ఏర్పడిందనీ, కువైట్ సహా చాలా దేశాలు ఈ సమస్యను ఎదుర్కొంటున్నాయని ఆయన వివరించారు. మోడెర్నా, జాన్సన్ అండ్ జాన్సన్ వ్యాక్సిన్లను కువైట్ త్వరలో దిగుమతి చేసుకోనుందని మినిస్టర్ పేర్కొన్నారు.