టీ20 ప్రపంచకప్‌లో భాగంగా నాగ్‌పూర్‌ వేదికగా జరిగిన తొలి క్వాలిఫైయర్‌ మ్యాచ్‌లో జింబాబ్వే 14 పరుగుల తేడాతో హాంకాంగ్‌పై విజయం సాధించింది. జింబాబ్వే బౌలర్లు కట్టుదిట్టంగా బంతులు విసరడంతో ఛేదనలో హాంకాంగ్‌ తడబడి 144/6 పరుగులు మాత్రమే చేయగలిగింది. టాస్‌ గెలిచిన హాంకాంగ్‌.. జింబాబ్వేని బ్యాటింగ్‌కు ఆహ్వానించింది. సిబండ అర్థశతకం (59 పరుగులు; 5×4, 2×6), చిగుంబుర మెరుపు బ్యాటింగ్‌ (30 పరుగులు; 3×6)తో జింబాబ్వే 158 పరుగుల లక్ష్యం నిర్దేశించింది. అనంతరం బ్యాటింగ్‌కు దిగిన హాంకాంగ్‌ జట్టులో జేమ్స్‌ అట్కిన్సన్‌ అర్థశతకం (53 పరుగులు; 4×4, 2×6), మిడిలార్డర్‌ బ్యాట్స్‌మెన్‌ తన్వీర్‌ అఫ్జల్‌ (31 పరుగులు; 3×4, 1×6) దూకుడుగా ఆడినా చివరి ఓవర్‌లో విజయానికి 23 పరుగులు కావాల్సి ఉండగా కేవలం ఎనిమిది పరుగులు మాత్రమే చేయగలడంతో ఓటమి తప్పలేదు.