బహ్రెయిన్ నుంచి సౌదీలోని పలు నగరాలకు కారు సర్వీసులను అందుబాటులోకి తీసుకొస్తున్నట్లు కరీమ్ సంస్థ వెల్లడించింది. వినియోగదారులు బహ్రెయిన్ నుండి వన్-వే ప్రయాణం కోసం దమ్మం, ఖోబార్, ధహ్రాన్, జుబైల్, బుకాయిక్, హుఫోఫ్, రియాద్ సహా ఇతర సౌదీ నగరాలకు  కారును బుక్ చేసుకోవచ్చు. ఇందుకు $198 నుండి ఛార్జీలు ప్రారంభమవుతాయని వెల్లడించింది. ప్రతీ ట్రిప్ లో కారులో ఐదుగురు ప్రయాణించేందుకు వీలుంటుంది. ఈ ఇంటర్ సిటీ కార్ సర్వీసులను పైలట్ ప్రాజెక్టుగా యూఏఈ-ఈజిప్టులో చేపట్టినట్లు కరీమ్ జీసీసీ జనరల్ మేనేజర్ ఖలీద్ నుసీబే తెలిపారు. తామ సంస్థ వ్యాపారాన్ని మరింత విస్తృతం చేయటంలో భాగంగా బహ్రెయిన్ మార్కెట్లో పెట్టుబడులను కొనసాగిస్తామని వివరించారు. నగరాల మధ్య సౌకర్యవంతమైన రవాణా సౌకర్యాన్ని అందించేందుకు తాము కట్టుబడి ఉన్నామన్నారు.