న్యూ ఢిల్లీ: 75వ స్వాతంత్ర్య దినోత్సవాన్ని పురస్కరించుకుని భారత ఉపరాష్ట్రపతి ముప్పవరపు వెంకయ్యనాయుడు దేశ ప్రజలకు శుభాకాంక్షలు చెప్పారు.భారతదేశం స్వరాజ్యం సముపార్జించుకుని 75 ఏళ్ళ మైలురాయిని చేరుకుంటున్న ఈ తరుణంలో, దేశం స్వేచ్ఛా వాయువులు పీల్చడం కోసం ఎన్నో త్యాగాలు చేసిన సమరయోధుల స్ఫూర్తితో, వారి ధైర్యం, దేశభక్తిని ప్రేరణగా తీసుకోవాలని సూచించారు.

ఈ సందర్భంలో దేశ పురోగతి, శ్రేయస్సు కోసం పాటుపడడం ప్రతి ఒక్కరూ తమ బాధ్యతగా భావించాలన్నారు. దేశంలోని అన్ని స్థాయిల ప్రజలకు అభివృద్ధి ప్రయోజనాలు అందిచడం, గౌరవప్రదమైన జీవితాన్ని అందేలా చూడాలని సూచించారు. మనకున్న దాన్ని నలుగురితో పంచుకోవడం, నలుగురి సంక్షేమం పట్ల శ్రద్ధ వహించడం (షేర్ అండ్ కేర్) వంటి భారతీయ విలువలను ఆదర్శంగా తీసుకుని, మన పౌరులందరికీ భద్రత, న్యాయం, స్వేచ్ఛ, సమానత్వం, సోదరభావం అనే రాజ్యంగపరమైన ఆదర్శాన్ని సాధించేందుకు కలిసి పని చేద్దామని పిలుపునిచ్చారు.

స్వాతంత్ర్య దినోత్సవం సందర్భంగా ఈ సంతోషకరమైన సందర్భాన్ని పురస్కరించుకుని మన అంతర్గత శక్తులను తిరిగి ఆవిష్కరించుకునేందుకు, మన ప్రజల అపారమైన సామర్థ్యాన్ని గ్రహించేందుకు, వివిధ దేశాల సహకారంలో భారతదేశానికి సముచిత స్థానం సంపాదించుకునేందుకు అందరం పునరంకితమయ్యే దిశగా ప్రతినబూనుదామన్నారు.