ఇరాన్ ఏ క్షణమైనా రాకెట్‌ను ప్రయోగించనుంది. మూడు దశల్లో ఆ రాకెట్ నింగికి ఎగరనున్నట్లు అమెరికా అధికారులు వెల్లడించారు. ఆ రాకెట్‌తో ఉపగ్రహాన్ని ప్రయోగించే అవకాశం కూడా ఉంది. ఇటీవల ఉత్తర కొరియా రాకెట్లను పరీక్షించిన తరహాలోనే ఇరాన్ కూడా ఆ దిశలో అడుగులు వేస్తోంది. ఖండాంతర క్షిపణులను ప్రయోగించే టెక్నాలజీని కూడా ఇరాన్ అభివృద్ధి చేస్తున్నట్లు తెలుస్తోంది. బుధవారమే ఆ దేశం రెండు బాలిస్టిక్ క్షిపణులను ప్రయోగించింది. ఐక్యరాజ్యసమితి ఆంక్షలను ఉల్లంఘించి ఇరాన్ ఆ మిసైళ్లను ప్రయోగించినట్లు అమెరికా ఆరోపిస్తోంది. ఇజ్రాయిల్‌ను ధ్వంసం చేసే క్షిపణులను రూపొందించినట్లు ఇరాన్ ఏజెన్సీ కూడా ఇటీవల ప్రకటించింది.ఒకవేళ అణు ఒప్పంద నియమాలను ఇరాన్ ఉల్లంఘిస్తే ఆ దేశంపై చర్యలను తీసుకుంటామని ఇజ్రాయిల్‌కు అమెరికా అభయహస్తం ఇచ్చింది.