వ చ్చీ రావడంతోనే బోలెడంత సందడిని సృష్టించడం మన కథానాయకుల శైలి. అందుకే సినిమాల్లో వాళ్ల పాత్రల్ని హోరెత్తిపోయే ఆటపాటల మధ్యే పరిచయం చేస్తుంటారు దర్శకులు. కథానాయకుడి పరిచయ గీతం... పేరుతో ప్రత్యేకంగా కసరత్తులు చేస్తుంటారు. అందుకోసం అందమైన భామల్ని కూడా రంగంలోకి దించుతుంటారు. తాజాగా వెంకీ కోసం ఓ ముద్దుగుమ్మ ఆడిపాడింది. మారుతి దర్శకత్వంలో వెంకటేష్‌ కథానాయకుడిగా ఓ చిత్రం తెరకెక్కుతోంది. నయనతార కథానాయిక. సితార ఎంటర్‌టైన్‌మెంట్‌ పతాకంపై సూర్యదేవర నాగవంశీ నిర్మిస్తున్నారు. హైదరాబాద్‌లో కథానాయకుడి పరిచయ గీతాన్ని తెరకెక్కించారు.ఆ పాటలో సోనమ్‌ బజ్వా అనే కథానాయికతో వెంకటేష్‌ ఆడిపాడారు. కథానాయకుడిని కీర్తిస్తూ సాగే ఆ పాట చిత్రానికి ప్రధాన ఆకర్షణగా నిలుస్తుందని చిత్రవర్గాలు చెబుతున్నాయి. ''వినోదానికి ప్రాధాన్యమున్న చిత్రమిది. వెంకీ శైలి మాస్‌ అంశాలు కూడా ఇందులో ఉంటాయి. ప్రస్తుతం హైదరాబాద్‌లో ప్రధాన తారాగణంపై కీలక సన్నివేశాల్ని తెరకెక్కిస్తున్నామ''ని తెలిపాయి చిత్రవర్గాలు. సంగీతం: జిబ్రాన్‌.