'ఆకాశమంత' సినిమాలో త్రిషకు భర్తగా నటించారు నటుడు గణేష్‌ వెంకట్రామన్‌. ప్రస్తుతం ఆయన త్రిష కథానాయకిగా నటించిన 'నాయకి' చిత్రానికి డబ్బింగ్‌ చెబుతున్నారు. ఈ విషయాన్ని గణేష్‌ సోషల్‌మీడియా ద్వారా తెలుపుతూ... దర్శకుడు గోవర్దన్‌ రెడ్డి(గోవి)తో కలిసి దిగిన ఫొటోలను అభిమానులతో పంచుకున్నారు. తొలిసారి తెలుగులో డబ్బింగ్‌ చెబుతున్నానంటూ ఆయన ఆనందం వ్యక్తం చేశారు. తనపై ఇంత నమ్మకం పెట్టుకుని డబ్బింగ్‌ చెప్పిస్తున్న దర్శకుడికి ఆయన ధన్యవాదాలు తెలిపారు. త్రిష కథానాయకిగా నటిస్తున్న ఈ చిత్రానికి గోవి దర్శకత్వం వహిస్తున్నారు.గిరిధర్‌ ప్రొడక్షన్‌ హౌస్‌ పతాకంపై గిరిధర్‌ మామిడిపల్లి, పద్మజ మామిడిపల్లిలు సంయుక్తంగా చిత్రాన్ని నిర్మిస్తున్నారు. రఘు కుంచె సంగీతం సమకూరుస్తున్నారు. ఇది హారర్‌ కామెడీ చిత్రం. గణేష్‌ వెంకట్రామన్‌, బ్రహ్మానందం, కోవైసరళ, సత్యం రాజేశ్‌, జయప్రకాశ్‌, మనోబాల తదితరులు ప్రధాన పాత్రలు పోషించారు. త్వరలో 'నాయకి' ప్రేక్షకుల ముందుకు రానుంది.