కువైట్: క్యాంపింగ్ సైట్ సమీపంలో తాత్కాలిక సహకార మార్కెట్ లను ఏర్పాటు చేసేందుకు సామాజిక వ్యవహారాల మంత్రిత్వ శాఖ సూత్రప్రాయంగా అంగీకారం తెలిపింది. యాన్యువల్ క్యాంపింగ్ సీజన్‌ను ప్రారంభించేందుకు మంత్రి మండలి ఆమోదం తెలిపిన నేపథ్యంలో ఈ మేరకు స్టడీ జరుగుతున్నట్లు అల్-జరిదా దినపత్రిక తన కథనంలో పేర్కొంది. కొన్ని సహకార సంస్థలదే గుత్తాధిపత్యం కొనసాగుతోంది. దీన్ని నిరోధించడం కోసమే ప్రభుత్వం అన్ని సహకార సంఘాలకు తాత్కాలిక మార్కెట్ లను ఏర్పాటు చేసుకునేందుకు స్థలాలు కేటాయించనున్నట్లు మంత్రిత్వ శాఖ వర్గాలు చెబుతున్నాయి. కువైట్ మున్సిపాలిటీ సమన్వయంతో లాటరీ విధానంలో వీటికి స్థలాలను కేటాయిస్తారు. మంత్రిత్వ శాఖ ఉన్నతాధికారులు ఇటీవల సహకార సంఘాల సమాఖ్య ప్రతినిధులతో సమావేశమయ్యారు. ఆ మీటింగ్ లోనే టెంపరరీ మార్కెట్ల ఏర్పాటు నిర్ణయం గురించి అన్ని సహకార సంఘాలకు తెలియజేయాలని సూచించింది.