బహ్రెయిన్: భారతీయ బయోటెక్నాలజీ కంపెనీ "భారత్ బయోటెక్" ఉత్పత్తి చేస్తున్న COVID-19 వ్యాక్సిన్ COVAXIN అత్యవసర వినియోగాన్ని బహ్రెయిన్ నేషనల్ హెల్త్ రెగ్యులేటరీ అథారిటీ (NHRA) ఈ రోజు ఆమోదించింది. ఇటీవల ప్రపంచ ఆరోగ్య సంస్థ కొవాగ్జిన్ వ్యాక్సిన్ ను ఆమోదించిన నేపథ్యంలో బహ్రెయిన్‌ కూడా వ్యాక్సిన్ వినియోగానికి ఆమోదం తెలిపింది. 18 సంవత్సరాలు అంతకంటే ఎక్కువ వయస్సు ఉన్న వారికి ఈ వ్యాక్సిన్ అందుబాటులో ఉంటుందని NHRA స్పష్టం చేసింది. భారత్ బయోటెక్ అందించిన డేటాను NHRA క్లినికల్ ట్రయల్స్ కమిటీ, ఆరోగ్య మంత్రిత్వ శాఖ ఇమ్యునైజేషన్ కమిటీ జాగ్రత్తగా మూల్యాంకనం చేసిన తర్వాతనే ఈ నిర్ణయం తీసుకోనబడిందని తెలిపింది. 26,000 మందికి పైగా ప్రజలపై వ్యాక్సిన్ క్లినికల్ ట్రయల్స్ నిర్వహించారు. రెండు-డోస్ రెజిమెన్ వ్యాక్సిన్ COVID-19కి వ్యతిరేకంగా 77.8% ప్రభావవంతంగా ఉందని, COVID-19 తీవ్రమైన కేసులకు వ్యతిరేకంగా 93.4% ప్రభావవంతంగా ఉందని క్లినికల్ డేటాలో వెల్లడైందని NHRA తెలిపింది.