మస్కట్: ఒమన్-సౌదీ రోడ్డును ఒమన్ సుల్తానేట్, సౌదీ అరేబియా ప్రారంభించాయి. ఈ మేరకు ఇరు దేశాలు ఒక ప్రకటన విడుదల చేశాయి. అల్ దహిరా గవర్నరేట్‌లోని ఇబ్రి రౌండ్‌ అబౌట్‌లో రోడ్డు ప్రారంభమై సౌదీ బాతా కూడలిలో ముగుస్తుంది. 725 కిలోమీటర్ల పొడవున్న ఈ రోడ్డు రెండు దేశాల మధ్య రాకపోకలను మరింత మెరుగు పరుస్తుంది. పబ్లిక్, గూడ్స్ ట్రాన్స్ పోర్టు వాహనాలు సాఫీగా సాగడానికి దోహదపడుతుంది. రవాణా, కమ్యూనికేషన్లు, ఇన్ఫర్మేషన్ టెక్నాలజీ మంత్రి సయీద్ బిన్ హమూద్ బిన్ సయీద్ అల్ మావలీ మాట్లాడుతూ.. ఈ రోడ్డు ప్రారంభం ద్వారా రెండు సోదర దేశాల మధ్య ఉన్న బంధం మరింత బలోపేతం అవుతుందన్నారు. ఎకనామిక్, ఫైనాన్షియల్, టూరిజం, ఇన్వెస్ట్ మెంట్ రంగాలకు మద్దుతుగా నిలుస్తుందని పేర్కొన్నారు. ఈ రోడ్డు మార్గం ఒమన్ సుల్తానేట్‌లోని  నెట్‌వర్క్ ఒమానీ పోర్ట్ లు, ఫ్రీ జోన్‌లు, ఎయిర్ పోర్టులతో కలుపుతుందని ఆయన చెప్పారు.