రస్‌ అల్‌ ఖైమాలో భారీ వర్షాల కారణంగా 67 ప్రమాదాలు చోటు చేసుకున్నాయి. అయితే ప్రమాదాలన్నీ చిన్నవే. పెద్ద ప్రమాదాలేవీ సంభవించినట్లు రిపోర్ట్స్‌ రాలేదు. పరిస్థితుల్ని ఎప్పటికప్పుడు అంచనా వేస్తున్నామనీ, ముందస్తు జాగ్రత్త చర్యల్లో భాగంగా జైస్‌ మౌంటెయిన్‌కి వెళ్ళే రోడ్డుని మూసివేసినట్లు అధికారులు చెప్పారు. వాతావరణ పరిస్థితులు ప్రమాదకరంగా వుంటే, వీలైనంతవరకు ఎవరూ రోడ్లపైకి రావొద్దని అధికారులు సూచించారు. అత్యవసర పరిస్థితుల్లో బయటకు వచ్చేవారు వాహనాల్ని నెమ్మదిగా నడపాలనీ, ప్రమాదకరంగా అనిపిస్తే రక్షిత ప్రాంతాల్లోనే వాహనాల్ని నిలపాలని సూచించారు పోలీసులు. ఎలాంటి ప్రమాదం సంభవించినా వెంటనే 999 మియు 998 నెంబర్లకు తెలియజేయాలన్నారు. వివిధ ప్రాంతాల్లో పోలీసులను, ఇతర భద్రతా సిబ్బందిని, మున్సిపల్‌ సిబ్బందిని కూడా నియమించారు. ట్యాంక్‌లు, పంప్‌లు అవసరమైన ప్రాంతాలకు తరలించారు. చాలా ప్రాంతాల్లో భారీ వర్షాలు కురిసే అవకాశం ఉన్నందున ప్రతి ఒక్కరూ అప్రమత్తంగా ఉండాలని పోలీసులు వెల్లడించారు.