దుబాయ్: గోల్డెన్ వీసా హోల్డర్‌లకు ప్రత్యేక డిస్కౌంట్లు, ఆఫర్లను అందించే ఈసాద్(Esaad) ప్రివిలేజ్ కార్డును దుబాయ్ ప్రభుత్వం బహుమతిగా ఇవ్వనుంది.  ఈ కార్డ్ ని దుబాయ్ పోలీసులు జారీ చేస్తారు. ఈసాద్ కార్డు సభ్యులకు ప్రత్యేకమైన ఆఫర్‌లు, డిస్కౌంట్‌లను అందిస్తుంది. దుబాయ్‌లో 5 ఏళ్లు, 10 ఏళ్ల గోల్డెన్ వీసాలు ఉన్నవారికి ఈ కార్డు ఉచితంగా అందించబడుతుంది. లాంగ్-టర్మ్ రెసిడెన్సీ స్కీమ్ ప్రారంభించినప్పటి నుండి ఇప్పటివరకు దుబాయ్‌లో 65,000 మంది విశిష్ట గోల్డెన్ వీసా నుండి ప్రయోజనం పొందారు. పబ్లిక్ ఇన్వెస్ట్‌మెంట్ ఫండ్‌లలో పెట్టుబడిదారులు, రియల్ ఎస్టేట్ పెట్టుబడిదారులు,  ప్రత్యేక ప్రతిభ ఉన్న వ్యక్తులు, సైన్స్ పరిశోధకులు, శాస్త్రవేత్తలు, వైద్యులు, నిపుణులు, ఆవిష్కర్తలు, సంస్కృతి, కళలో సృజనాత్మక రంగాలలో గోల్డెన్ వీసా హోల్డర్‌లకు ఈ కార్డులను అందజేయనున్నారు. యూఏఈ, ప్రపంచవ్యాప్తంగా 92 దేశాలలో 7,237 బ్రాండ్‌లు, వ్యాపారాలలో ఈసాద్ కార్డ్ హోల్డర్‌లకు ప్రత్యేకమైన ఆఫర్‌లు, తగ్గింపులు అందుబాటులో ఉన్నాయని దుబాయ్ ఎగ్జిక్యూటివ్ కౌన్సిల్ సెక్రటరీ జనరల్ అబ్దుల్లా మొహమ్మద్ అల్ బస్తీ తెలిపారు.