సింగర్ శ్రావణ భార్గవి అందరికీ సుపరిచితురాలే. ఆమె గొంతులో ఏదో మాధుర్యం వుంది. అందుకే ఇట్టే నచ్చేస్తుంటుంది. ఆమె స్వరం వీనుల విహారం. ఇవన్నీ తెలిసిన సంగతులే. అందుకే ఆ మధుర స్వరంతో అన్నమయ్య కీర్తనను ఆలపించాలన్న కోరిక పుట్టిందట శ్రావణ భార్గవికి.
అనుకున్నదే తడవుగా, ‘ఒక పరి..’ అనే అన్నమయ్య కీర్తనను తన సొంత గొంతుతో అందుకుంది. గాన మాధురే కదా. పాట బాగా వచ్చింది. అయితే, వచ్చిన చిక్కల్లా.. ఈ పాటకు శ్రావణ భార్గవి ఓ వీడియో చేసింది. ఆ వీడియోని యూ ట్యూబ్‌లో అప్‌లోడ్ చేసింది. 

అదే చిక్కు తెచ్చిపెట్టింది. ఈ వీడియోలో శ్రావణ భార్గవి కాస్త అభ్యంతరకరంగా కనిపించిందట అభ్యంతరం వ్యక్తం చేసిన వాళ్ల కళ్లకు. అదేనండీ, టీటీడీ ప్రతినిధులు కొందరికి. ఇక అంతే, అన్నమయ్య కీర్తన పాడుతూ శృంగారం చేస్తావా.. అంటూ ఆ వీడియోని యూ బ్యూట్ నుంచి తొలగించాలంటూ ఆమెపై తెగ గుస్సా అవుతున్నారు. 

ఆ వీడియోలో వాళ్ల కళ్లకు కనిపించిన శృంగారం ఏంటో అర్ధం కాక కొందరు జుట్టు పట్టుకుంటున్నారు. అందులో తప్పేముంది..? అంటూ శ్రావణ భార్గవి సైతం ఎదురు ప్రశ్నిస్తోంది. 

అందుకేనేమో.. ‘ఊ అంటావా మామా.. ఊహూ అంటావా మామా..’ అంటూ సమంత ముందే చెప్పేసింది చూసే కళ్లల్లోనే వుంది వంకర బుద్ది..!