తెలంగాణలో మండుతున్న ఎండలకు తోడు వడగాల్పులు ఉక్కిరి బిక్కిరి చేస్తున్నాయి. ఇంటా, బయట ఉక్కపోతతో జనం బేజారెత్తిపోతున్నారు. మంగళవారం హైదరాబాద్‌లో గరిష్టంగా 41.8 డిగ్రీల ఉష్ణోగ్రతలు నమోదు అయ్యాయి. వడగాల్పుల తీవ్రత ఎక్కువగా ఉండటంతో వాతవారణశాఖ ప్రమాద హెచ్చరికలు జారీ చేసింది. ఉదయం 11 నుంచి సాయంత్రం 5 గంటల వరకు అధిక ఉష్ణోగ్రతలు నమోదు అవుతున్నాయని వాతావరణశాఖ అధికారులు చెబుతున్నారు. రెండు రోజుల పాటు అత్యవసర పనులు ఉంటే తప్ప ఎండలో బయటకు వెళ్లొద్దని సూచించారు. ముఖ్యంగా వృద్ధులు, చిన్నారులు, గర్భిణిలు ఎండబారిన పడకుండా తగు జాగ్రత్తలు తీసుకోవాలని వైద్యులు సూచించారు.