భారత విమానయాన రంగంలో ఇటీవలే అడుగుపెట్టిన ఆకాశ ఎయిర్ కు అప్పుడే కష్టాలు చుట్టుముట్టాయి.ఈ నెల 7న ఆకాశ తన  విమాన సర్వీసులను ప్రారంభించింది.నెల రోజులు కూడా పూర్తికాకుండానే ఆ సంస్థ వినియోగదారులకు చెందిన డేటాపై హ్యాకర్లు పంజా విసిరారు. వినియోగదారుల డేటాను తస్కరించారు.దీనిపై స్పందించిన ఆకాశ ఎయిర్.. వినియోగదారులకు క్షమాపణలు తెలిపింది.

పేర్లు, జెండర్, వివరాలు, ఈ-మెయిల్, ఫోన్ నంబర్లను మాత్రమే హ్యాకర్లు తస్కరించారని వివరణ ఇచ్చింది. ప్రయాణ సంబంధ వివరాలు కానీ, ట్రావెల్ రికార్డులు కానీ, చెల్లింపు సమాచారం కానీ అందులో లేవని స్పష్టం చేసింది. అయితే, వారు తస్కరించిన కొద్ది సమాచారంతోనే ఫిషింగ్ తరహా మోసపూరిత చర్యలకు పాల్పడే అవకాశం ఉందని, కాబట్టి వినియోగదారులు అప్రమత్తంగా ఉండాలని ఆకాశ ఎయిర్ సూచించింది. 

ఈ నెల 25న ఆకాశ కంప్యూటర్ వ్యవస్థలో టెక్నికల్ కాన్ఫిగరేషన్ ఎర్రర్ వచ్చింది. వెంటనే అప్రమత్తమైన ఆకాశ ఎయిర్ తన సిస్టం ఫంక్షనల్ ఎలిమెంట్స్‌ను పూర్తిగా మూసివేసింది. ఫలితంగా అనధికార యాక్సెస్‌ను నిరోధించింది. సమస్యను పరిష్కరించిన తర్వాత తిరిగి సైన్-అప్ అయినట్టు ఆకాశ ఎయిర్ తెలిపింది. ఈ ఘటన కారణంగా జరిగిన ఎలాంటి అసౌకర్యానికైనా క్షమాపణలు కోరుతున్నట్టు పేర్కొంది. కాగా, ఈ హ్యాకింగ్‌పై  ఆకాశ ఎయిర్ కేంద్ర ప్రభుత్వానికి చెందిన కంప్యూటర్ ఎమర్జెన్సీ రెస్పాన్స్ టీమ్ కి ఫిర్యాదు చేసింది.