వివేక్‌ ఒబెరాయ్‌ కథానాయకుడిగా 'రాయ్‌' అనే టైటిల్‌తో చిత్రాన్ని తెరకెక్కించనున్నట్లు ప్రముఖ దర్శకుడు రామ్‌గోపాల్‌వర్మ పేర్కొన్నారు. ఈ విషయాన్ని ఆయన తన ట్విట్టర్‌ ఖాతా ద్వారా వెల్లడించారు. మే 1న ఈ చిత్రం ప్రారంభోత్సవ కార్యక్రమాన్ని నిర్వహించనున్నట్లు తెలిపారు. తొలుత ఈ చిత్రానికి సుదీప్‌ని అనుకున్నామని... కొన్ని కారణాల వల్ల వివేక్‌తో తీస్తున్నామన్నారు.
మంగళూర్‌, బెంగళూర్‌, ముంబయి, దుబాయ్‌, లండన్‌లో ఈ చిత్రం చిత్రీకరణ జరగనున్నట్లు పేర్కొన్నారు. డాన్‌ నుంచి కార్యకర్తగా మారిన ముత్తప్ప రాయ్‌ తన కోరిక మేరకు మే 1న ఈ చిత్రం ఫస్ట్‌లుక్‌ పోస్టర్‌ను విడుదల చేయడానికి అంగీకరించారని, ఆ రోజు ఆయన పుట్టినరోజని తెలిపారు. సీఆర్‌ మనోహర్‌ ఈ చిత్రానికి నిర్మాతగా వ్యవహరిస్తారని, తెలుగు, తమిళం, కన్నడ, హిందీ మొత్తం నాలుగు భాషల్లో ఈ చిత్రాన్ని తీస్తున్నట్లు వర్మ ట్వీట్‌ చేశారు.