దోహాలోని ఎఫ్‌-రింగ్‌ రోడ్‌పై ప్రయాణించే వాహనదారులు ఫ్యూయల్‌ స్టేషన్ల కోసం విజ్ఞప్తి చేస్తున్నారు. అదనంగా స్టేషన్లను ఏర్పాటు చేయడం ద్వారా ఫ్యూయల్‌ సమస్యనుంచి తమకు ఉపశమనం కల్పించాలని వాహనదారులు కోరారు. శాశ్వతంగా ఏర్పాటు చేసే స్టేషన్లకన్నా ముందు మొబైల్‌ ఫ్యూయల్‌ స్టేషన్లు ఏర్పాటు చేయాలని అధికారులకు సూచిస్తున్నారు వాహనదారులు. ప్రతిరోజూ ఈ రోడ్డును వినియోగించే వాహనదారులు ఫ్యూయల్‌ సమస్యల్ని ఎదుర్కొంటున్నారు. 15 నెలల క్రితమే ఎఫ్‌ రింగ్‌రోడ్‌ మీద వాహనాలకు అనుమతించారు. భారీ సంఖ్యలో నిత్యం ఈ రోడ్డుపై వాహనాలు ప్రయాణిస్తుంటాయి. ఈ రోడ్డుని ఎక్కువగా వినియోగించే అల్‌ తుమామా ప్రాంత ప్రజలు, ఫ్యూయల్‌ కొరతతో తీవ్ర ఇబ్బందులు ఎదుర్కొంటున్నట్లు చెప్పారు. బర్వా సిటీ మరియు మెసైమీర్‌ ప్రాంతాల్లోనివారికీ ఇదే సమస్య ఎదురవుతోంది.