దుబాయ్: నెలకు Dh1300 సంపాదించే నేపాల్ కార్ వాషర్ భరత్ బీకే (31).. మహ్జూజ్ డ్రాలో 10 మిలియన్ దిర్హామ్‌లను గెలుచుకున్నాడు. ఈ సందర్భంగా భరత్ మాట్లాడుతూ.. మూడు సంవత్సరాల క్రితం దుబాయ్‌కి వచ్చినప్పుడు బ్రెయిన్ ట్యూమర్‌తో బాధపడుతున్న తన 25 ఏళ్ల తమ్ముడికి చికిత్స చేసేందుకు డబ్బు సంపాదించడమే తన లక్ష్యంగా ఉందన్నారు. ఇద్దరు పిల్లల తండ్రి అయిన భరత్ కి ఇంకా బ్యాంకు అకౌంట్ లేకపోవడం గమనార్హం. ఈ నేపథ్యంలో భరత్ కు బ్యాంక్ ఖాతా తెరవడంలో సహాయం చేయనున్నట్లు మహ్జూజ్ ఆపరేటర్, EWINGS సీఈఓ ఫరీద్ సామ్జీ తెలిపారు. భరత్ కు ఐదేళ్ల కొడుకు, మూడేళ్ల కూతురు ఉన్నారు. గెలిచిన డబ్సుతో వాళ్ల భవిష్యత్ తీర్చిదిద్దనున్నట్లు భరత్ పేర్కొన్నారు. సెప్టెంబర్ 27న నేపాల్‌కు తిరిగి వెళ్లాలని ప్లయిట్ టిక్కెట్ కొనుగోలు చేశానని, ఈ క్రమంలో చివరి సారి లాటరీలో లక్కును పరిక్షించుకోవాలని నిర్ణయించుకొని ఇద్దరు స్నేహితులతో కలిసి లాటరీ టిక్కెట్లు కొనుగోలు చేసినట్లు భరత్ వివరించారు. మహ్జూజ్ భారీ బహుమతిని గెలుచుకున్న మొదటి నేపాల్ ప్రవాసుడు భరత్. అలాగే డ్రా చరిత్రలో అతి తక్కువ సంపాదన కలిగిన విజేతలలో ఒకరు కావడం విశేషం.