సౌదీ: సౌదీ అరేబియాలో విడాకుల రేటు క్రమంగా పెరుగుతోంది. ప్రతిరోజూ 168 కేసులు నమోదవుతుండగా.. సగటున ప్రతి గంటకు 7 విడాకుల కేసులు వస్తున్నాయి. సౌదీ జనరల్ అథారిటీ ఫర్ స్టాటిస్టిక్స్ ప్రకారం.. 2020 చివరి కొన్ని నెలల్లో 57,595 విడాకుల డిక్రీలు జారీ చేయబడ్డాయి. 2019తో పోలిస్తే 12.7 శాతం పెరిగాయి. అయితే విస్తృతమవుతున్న సోషల్ మీడియా ప్లాట్‌ఫారమ్‌లు దీనికి ప్రధాన కారణంగా భావిస్తున్నారు. సౌదీ న్యాయవాది దఖిల్ అల్ దఖిల్ మాట్లాడుతూ.. గత 10 సంవత్సరాలలో విడాకుల కేసుల సంఖ్య గణనీయంగా పెరిగిందన్నారు. 2010లో కేవలం 9,233 కేసులు మాత్రమే ఉండగా.. 2011లో ఆ సంఖ్య 34 వేలకు చేరాయన్నారు. ఆ తర్వాతి సంవత్సరాలలో విడాకుల కేసులు 57 వేలకు చేరాయని వివరించారు. 2020లో రాజ్యంలో ప్రతి గంటకు 7 విడాకుల కేసులు నమోదవుతున్నాయని నివేదికలు చెబుతున్నాయి. సౌదీ సమాజంలో పెరుగుతున్న విడాకుల కేసుల సంఖ్య పెరగడానికి 2019లో వచ్చిన కోవిడ్-19 మహమ్మారి కారణమని అల్ దఖిల్ పేర్కొన్నాడు. సౌదీ కుటుంబాలను. అరబ్ కుటుంబాలను నాశనం చేయడంలో మీడియా ప్లాట్‌ఫారమ్‌లు ముఖ్యమైన పాత్ర పోషిస్తున్నాయన్నారు. ఇతర కారణాలలో సామాజిక వ్యత్యాసాలు, జీవితంలో అసమాన లక్ష్యాలు, ప్రాధాన్యతలు, అలాగే సాంస్కృతిక అసమానతలు ఉన్నాయని అల్ దఖిల్ వివరించారు.