యూఏఈ: దుబాయ్ ఫెస్టివల్ సిటీ మాల్‌లో సోమవారం సాయంత్రం అగ్నిప్రమాదం జరిగింది. ఈ ఘటనలో ఎలాంటి ప్రాణనష్టం జరగకపోవడంతో అందరూ ఊపిరిపీల్చుకున్నారు. దుబాయ్ సివిల్ డిఫెన్స్ అధికారుల కథనం ప్రకారం..  రాత్రి 7.28 గంటలకు మాల్ ముఖద్వారంలో చెలరేగిన మంటలను సిబ్బంది గుర్తించారు. వెంటనే ఆపరేషన్ అధికారులను అప్రమత్తం చేశారు. ఆరు నిమిషాల వ్యవధిలో అగ్నిమాపక సిబ్బంది సంఘటనా స్థలానికి చేరుకుని ఎగసిపడుతున్న మంటలను ఆర్పివేశారు. రాత్రి 7.42 గంటలకు మంటలను పూర్తిగా అదుపులోకి తీసుకొచ్చారు. అనంతర చేపట్టిన శీతలీకరణ కార్యకలాపాలు రాత్రి 8.09 గంటల వరకు కొనసాగాయి. ఆ తర్వాత మాల్ ని మూసివేయించి.. తదుపరి చేపట్టాల్సిన రక్షణ చర్యల కోసం సంబంధిత అధికారులకు అప్పగించారు.