యూఏఈ: అధిక లాభాల పేరుతో మహిళను ఓ వ్యక్తి Dh560,000 మేర మోసం చేశాడు. దీంతో బాధితురాలు అబుధాబి ఫ్యామిలీ అండ్ సివిల్ అడ్మినిస్ట్రేటివ్ కోర్టులో సదరు వ్యక్తిపై దావా వేసింది. ఆ వ్యక్తి తన నుండి మోసపూరితంగా తీసుకున్న Dh560,000 దిర్హామ్‌లను తిరిగి ఇప్పించాలని కోరింది. అలాగే తనకు జరిగిన నష్టానికి 100,000 దిర్హామ్‌లు పరిహారం చెల్లించాలని కోర్టును అభ్యర్థించింది. నిందితుడు ఆన్‌లైన్ ప్లాట్‌ఫారమ్ ద్వారా తనకు పరిచయం అయ్యాడని, లాభదాయకమైన వ్యాపారం గురించి తనకు తెలుసని చెప్పి తనను ఒప్పించాడని మహిళ తన దావాలో వివరించింది. తాను కూడా అదే వ్యాపారంలో పెట్టుబడి పెట్టానని ఆ వ్యక్తి చెప్పడంతో తాను అతడిని నమ్మానని ఆ మహిళ తెలిపింది. ఆ తర్వాత ఆమె Dh560,000 లను నిందితుడి బ్యాంక్ ఖాతాకు బదిలీ చేసినట్లు తెలిపింది. అనంతరం పెట్టుబడి పెట్టిన లాభాల కోసం నెలల తరబడి ఎదురుచూసినా ఫలితం లేకుండా పోయిందని ఆ మహిళ వాపోయింది. ఆ వ్యక్తి తనను మోసం చేశాడని గ్రహించిన ఆమె.. నిందితుడిపై ఇంతకుముందు క్రిమినల్ ఫిర్యాదు చేశానని, అబుధాబి క్రిమినల్ కోర్ట్ మోసం చేసిన వ్యక్తిని దోషిగా నిర్ధారించిందని మహిళ తెలిపింది. అన్ని పక్షాల వాదనలు విన్న తర్వాత సివిల్ కోర్టు న్యాయమూర్తి ప్రతివాది మహిళ నుండి మోసపూరితంగా తీసుకున్న Dh560,000 తిరిగి ఇవ్వాలని ఆ వ్యక్తిని ఆదేశిస్తూ తీర్పును ఇచ్చారు. క్రిమినల్ కోర్టు ఆ వ్యక్తికి ఇంతకుముందు Dh21,000 తాత్కాలిక పరిహారం ఇచ్చిందని స్పష్టం చేసిన న్యాయస్థానం ఫిర్యాది పరిహార దావాను తిరస్కరించింది.