నాగ్‭పూర్: మహారాష్ట్రలోని నాగ్‭పూర్ మెట్రోకు గిన్నీస్ వరల్డ్ రికార్డులో చోటు దక్కింది. ప్రపంచంలోనే అత్యంత పొడవైన రెండంతస్తుల ఫ్లైఓవర్ గల మెట్రోగా నాగ్‭పూర్ మెట్రో ఈ ఘనత దక్కించుకుంది. ప్రపంచవ్యాప్తంగా ఉన్న మెట్రో నిర్మాణాల్లో ఇంత పొడవులో రెండంతస్తుల ఫ్లైఓవర్ ఎక్కడా నిర్మించలేదు. దీని పొడవు 3.14 కిలోమీటర్లు ఉంటుంది (రోడ్డుపై రోడ్డు వంతెన ఉంటుంది. ఆ వంతెన పైన మెట్రో నిర్మాణం చేపట్టారు). నాగ్‭పూర్ మెట్రో పేరు మీదే గతంలో కూడా ఒక రికార్డు ఉంది. డబుల్ డక్కర్ పద్దతిలో అత్యధిక మెట్రో స్టేషన్లు నిర్మించి.. ఆసియా బుక్ ఆఫ్ రికార్డ్స్‭లో నాగ్‭పూర్ మెట్రో చోటు సంపాదించుకుంది.

వార్దా రోడ్డులో నిర్మించిన డబుల్ డెక్కర్ వయడక్ట్ సుమారు 3.14 కిలోమీటర్ల మేర ఉంటుంది. కాగా, గిన్నీస్ బుక్ ఆఫ్ వరల్డ్ రికార్డ్స్ ఇచ్చిన ధ్రువ పత్రాన్ని నాగ్‭పూర్ మెట్రో భవన్‭లో మంగళవారం జరిగిన ఓ కార్యక్రమంలో మహారాష్ట్ర మెట్రో ఎండీ బ్రిజేష్ దీక్షిత్ అందుకున్నారు. కాగా, తమకు ఈ అవార్డ్ లభించి తమ బాధ్యత మరింత పెంచిందని, వార్దా రోడ్డులో నిర్మాణం చేపట్టడం అతి పెద్ద సవాలని, దాన్ని తాము అధిగమించినందుకు ఆనందంగా ఉందని బ్రిజేష్ దీక్షిత్ అన్నారు.

ఇక నాగ్‭పూర్ మెట్రో గిన్నీస్ రికార్డు సాధించడంపై కేంద్ర మంత్రి నితిన్ గడ్కరీ హర్షం వ్యక్తం చేస్తూ మహారాష్ట్ర మెట్రోకు శుభాకాంక్షలు తెలిపారు. ఈ సందర్భంగా భారత జాతీయ రహదారుల సంస్థకు కూడా శుభాకాంక్షలు తెలిపారు. పైన 3.14 కిలోమీటర్ల డబుల్ డెక్కర్ వయడక్ట్ నిర్మాణం, అలాగే మెట్రో కింద జాతీయ రహదారి నిర్మాణం అద్భుతమని గడ్కరి అన్నారు.