స్టార్‌డమ్‌తో సంబంధం లేకుండా సినిమాలతో పాటూ, డిజిటల్ రంగంలోనూ నటీ నటులు ఆసక్తి చూపిస్తున్న సంగతి తెలిసిందే. ఈ క్రమంలోనే అక్కినేని బుల్లోడు నాగ చైతన్య ‘దూత’ అనే ఓ వెబ్ సిరీస్‌లో నటిస్తున్నాడు.
ఎప్పుడో అనౌన్స్‌మెంట్‌కి వచ్చిన ఈ సిరీస్ గురించి ఇంతవరకూ ఎలాంటి అప్‌డేట్ రాలేదు. చైతూతో ‘మనం’ సినిమా తెరకెక్కించిన విక్రమ్ కుమార్ ఈ సిరీస్‌ని రూపొందిస్తున్నాడు. డిజిటల్ వరల్డ్‌లో అత్యంత ప్రతిష్టాత్మకంగా రూపొందుతోన్న ఈ వెబ్ సిరీస్‌ని సైకలాజికల్ థ్రిల్లర్ నేపథ్యంలో రూపొందిస్తున్నారు. 
తమిళ, మలయాళ పరిశ్రమల నుంచీ ప్రముఖ నటీనటులు ఈ సిరీస్‌లో వివిధ పాత్రలు పోషిస్తుండగా, తమిళ డైరెక్టర్ కమ్ యాక్టర్ తరుణ్ భాస్కర్ కూడా కీలక పాత్ర పోషిస్తున్నాడు. కాగా, చైతూ ఈ సిరీస్‌లో జర్నలిస్ట్ పాత్రలో కనిపించబోతున్నాడంటూ ఓ లీక్ బయటికి వచ్చింది. 
సినిమాల్లో ఇంతవరకూ చైతూ పోషించని ఇంటెన్స్‌ రోల్‌గా ఈ రోల్ గురించి గొప్పగా చెబుతున్నారు. ఓటీటీ వేదికగా ఈ సిరీస్ చైతూకి మంచి పేరు తీసుకొస్తుందని నమ్మకం వ్యక్తం చేస్తున్నారు.
మరోవైపు, వెంకట్ ప్రభు దర్శకత్వంలో చైతూ ‘కస్టడీ’ అను యాక్షన్ థ్రిల్లర్‌లో నటిస్తున్న సంగతి తెలిసిందే. కృతి శెట్టి ఈ సినమాలో చైతూకి జోడీగా నటిస్తోంది.