విశాఖపట్నం: మెగాస్టార్‌ చిరంజీవి నటించిన వాల్తేరు వీరయ్య సినిమా ప్రీ రిలీజ్‌ వేడుకలను ఎట్టకేలకు పోలీసులు అనుమతి ఇచ్చారు. ఆంధ్రా యూనివర్సిటీ ఇంజినీరింగ్‌ కళాశాల మైదానంలో నిర్వహించడానికి పోలీసులు అనుమతులు మంజూరు చేయడంతో అనుమానాలకు, వదంతులకు తెరపడింది. మొదట ఈవెంట్‌కు విశాఖలోని ఆర్కే బీచ్‌లో అనుమతులు కోరినప్పటికీ ఆదివారం కావడం, వాహనాల రద్దీ, సందర్శకులు తాకిడి ఎక్కువగా ఉండే అవకాశం ఉన్నందున మరొక ప్రత్యామ్నాయం చూసుకోవాలని నిర్వాహకులకు పోలీసులు సూచించారు. ఈ క్రమంలో ఆంధ్రా యూనివర్సిటీ ఇంజినీరింగ్‌ కళాశాలలో నిర్వహించేందుకు షరతులతో కూడిన అనుమతిని వైజాగ్‌ ఈస్ట్‌ ఎసిపి డివిఎస్‌వై.మూర్తి మంజూరు చేశారు.