యూఏఈ: ప్రపంచవ్యాప్తంగా 'అపరిమిత' వార్షిక సెలవు విధానాన్ని అమలు చేసిన కంపెనీలు ఉద్యోగుల రిటెన్షన్ తోపాటు మెరుగైన ఉత్పాదకత సాధించినట్లు నివేదించాయి. దీంతో  ఈ విధానంపై యూఏఈలో చర్చ మొదలైంది. అపరిమిత సెలవు దినాల భావన చాలా అరుదుగా ఉన్నప్పటికీ, అది సాధ్యమేనని యూఏఈలోని పలు కంపెనీల్లోని నిపుణులు అభిప్రాయపడుతున్నారు. ఇతర దేశాల్లో, టెక్నాలజీ రంగంలోని సంస్థలు ఈ విధానాన్ని విజయవంతంగా అమలు చేస్తున్నాయి. దీనిని యూఏఈలోని టెక్ రంగంలో బహుళజాతి సంస్థలలో కూడా అమలు చేస్తే అద్భుత ఫలితాలు వచ్చే అవకాశం ఉందని గ్లోబల్ రిక్రూట్‌మెంట్ ఏజెన్సీ హేస్‌లో కన్సల్టెంట్ జేమ్స్ టోయ్ తెలిపారు. యూఏఈలోని ఉద్యోగులకు వర్క్-లైఫ్ బ్యాలెన్స్, ఫ్లెక్సిబుల్ వర్కింగ్‌కు ప్రాధాన్యత ఉంటుందన్నారు.  

దుబాయ్‌కి చెందిన సూపర్ యాప్ కరీమ్ రివార్డ్స్ అండ్ బెనిఫిట్స్ డైరెక్టర్ కై సిన్ టాన్ మాట్లాడుతూ..  అపరిమిత సెలవు దినాల విధానం ఉద్యోగుల మనోధైర్యాన్ని పెంచుతుందని పేర్కొన్నారు. ఉద్యోగులు కుటుంబాలతో ఎక్కువ కాలం గడపడం కంపెనీ ఉత్పాదనపై ప్రభావం చూపుతుందన్నారు.  ఉద్యోగులకు అవసరమైనప్పుడు విశ్రాంతి తీసుకునేలా ప్రోత్సహించిన పక్షంలో దాని ప్రభావం కంపెనీ ఉత్పాదకత, ఉద్యోగ సంతృప్తిని పెంచుతుందని అభిప్రాయపడ్డారు.