యూఏఈ: మార్కెట్‌లో చెలామణి కోసం పాలిమర్‌తో తయారు చేయబడిన Dh1,000 డినామినేషన్ కొత్త నోటును యూఏఈ సెంట్రల్ బ్యాంక్ (CBUAE) విడుదల చేసింది. కొత్త నోటు నేటి నుండి బ్యాంకులు, ఎక్స్ఛేంజ్ హౌస్‌లలో అందుబాటులోకి వచ్చింది. కొత్త నోటు రూపకల్పనలో యూఏఈ ప్రపంచ విజయాలను ప్రతిబింబించే సాంస్కృతిక , అభివృద్ధి చిహ్నాలతో పాటు చిత్రాలను సెంట్రల్ బ్యాంక్ ఉపయోగించింది. అదే విధంగా కొత్త నోటు రూపకల్పనలో అంతరిక్ష పరిశోధనలో విజయాలను హైలెట్ చేసింది. ఈ నోటును ప్రజలు సులభంగా గుర్తించడానికి వీలుగా మధ్యలో ఫ్లోరోసెంట్ బ్లూ గుర్తులతో పాటు , అధునాతన ఇంటాగ్లియో ప్రింటింగ్ పద్ధతులను ఉపయోగించి రూపొందించిన డ్రాయింగ్‌లు, శాసనాలను పొందుపరిచారు. కొత్త నోటు ముందు వైపు దివంగత షేక్ జాయెద్ బిన్ సుల్తాన్ అల్ నహ్యాన్, 1974లో నాసా పయినీర్‌లతో జరిగిన సమావేశం నుండి ప్రేరణ పొందిన స్పేస్ షటిల్ మోడల్ చిత్రం ఉంది. ఇంధన వనరులను వైవిధ్యపరచడంలో.. కార్బన్ ఉద్గారాలను తగ్గించడంలో కీలక పాత్ర పోషిస్తుందని తెలియజేసేందుకు నోటు వెనుక భాగంలో అబుధాబిలోని బరాకా న్యూక్లియర్ ఎనర్జీ ప్లాంట్ చిత్రాన్ని ప్రింట్ చేశారు.