యూఏఈ: బెటర్‌హోమ్స్ తాజా గణాంకాల ప్రకారం.. 2023 మొదటి త్రైమాసికంలో దుబాయ్ రియల్ ఎస్టేట్ మార్కెట్లో బ్రిటీష్, భారతీయ, రష్యన్ జాతీయులు అగ్రశ్రేణి పెట్టుబడిదారులుగా ఉన్నారు. ఇతర జాతీయులలో ఇటలీ, లెబనాన్, ఈజిప్ట్, టర్కీ, ఫ్రాన్స్, చైనా పెట్టుబడిదారులు టాప్ 10 జాబితాలో ఉన్నారు. రష్యా-ఉక్రెయిన్ వివాదం తర్వాత యూరప్‌లో పెరుగుతున్న వ్యయాలు, మహమ్మారిని దుబాయ్ సమర్థవంతంగా నిర్వహించడం, స్థిరమైన ఆర్థిక వ్యవస్థ వంటి అనేక కారణాల వల్ల ఇటీవల యూరప్, రష్యాకు చెందిన పెట్టుబడిదారులు దుబాయ్ రియల్ ఎస్టేట్ మార్కెట్‌లో భారత ఉపఖండం పెట్టుబడిదారులను అధిగమించారు. విదేశీ యాజమాన్యం శాతం సడలింపు, 10 సంవత్సరాల గోల్డెన్ వీసాల జారీ కూడా విదేశీ పెట్టుబడిదారులను ఆకర్షిస్తోందని నివేదిక తెలిపింది.  

దుబాయ్‌కి చెందిన సమనా డెవలపర్స్ తన తాజా ప్రాజెక్ట్‌లో యూరోపియన్లు టప్ పెట్టుబడిదారులుగా ఉన్నారని తెలిపింది. ఫ్రాన్స్, జర్మనీ, యూకే, నెదర్లాండ్స్, స్వీడన్, స్విట్జర్లాండ్, ఆస్ట్రియా, బెల్జియం, నార్వే దేశాలకు చెందిన యూరోపియన్లు దుబాయ్ ప్రాపర్టీలలో ప్రధానంగా పెట్టుబడులు పెడుతున్నారని సమనా డెవలపర్స్ జనరల్ మేనేజర్ నజ్మెహ్ జాఫారీ తెలిపారు. ప్రాపర్టీ కొనుగోలుదారులు ప్రధానంగా జర్మనీ, ఫ్రాన్స్, స్విట్జర్లాండ్ నుండి వస్తున్నారని కోల్డ్‌వెల్ బ్యాంకర్ యూఏఈ వైస్ ప్రెసిడెంట్ అమాన్ యూసఫ్ చెప్పారు.