మస్కట్: హౌసింగ్, అర్బన్ ప్లానింగ్ మంత్రిత్వ శాఖ “గ్రేటర్ మస్కట్ మాస్టర్‌ప్లాన్” సమగ్ర, మల్టీ-మోడల్ రవాణా నెట్‌వర్క్‌లో భాగంగా రవాణా, కమ్యూనికేషన్ వ్యవస్థను అభివృద్ధి చేస్తుంది. హౌసింగ్ అండ్ అర్బన్ ప్లానింగ్ మంత్రిత్వ శాఖలోని అర్బన్ స్ట్రాటజీ ఎగ్జిక్యూటివ్ డైరెక్టర్ ఇబ్రహీం హమూద్ అల్ వాలీ మాట్లాడుతూ.. మాస్టర్‌ప్లాన్‌లో మస్కట్ మెట్రో నిర్మాణం కూడా ఉందని చెప్పారు. మస్కట్‌లోని వ్యూహాత్మక ప్రాంతాల్లోని ప్రధాన స్టేషన్‌లు రానున్నాయని తెలిపారు. ఎక్స్‌ప్రెస్ బస్సులు, ఇతర రవాణా మార్గాల ద్వారా మెట్రోకు వెళ్లే అవకాశం ఉందని ఆయన తెలిపారు. రవాణా నెట్‌వర్క్‌ను పెంచడానికి, మాస్టర్‌ప్లాన్ అల్ అమెరత్, బాషర్ విలాయత్‌ల మధ్య సొరంగం నిర్మించే అవకాశాన్ని అధ్యయనం చేస్తున్నట్టు తెలిపారు. బాషర్-అల్ అమెరత్ టన్నెల్ అని పిలువబడే మరో ప్రాజెక్ట్ మస్కట్ మునిసిపాలిటీ, ఆర్థిక మంత్రిత్వ శాఖతో సహా సంబంధిత విభాగాలు అధ్యయనం చేస్తున్నాయని అల్ వాలీ వివరించారు.