హైదరాబాద్ ను మరోసారి భారీ వర్షం ముంచెత్తింది. శుక్రవారం సాయంత్రం 5 గంటల ప్రాంతంలో నగరంలోని పలు ప్రాంతాల్లో ఉరుములు, మెరుపులతో కూడిన భారీ వర్షం కురిసింది. బలమైన ఈదురుగాలులు వీయడంతో పాటు వడగళ్లు పడ్డాయి. అనేకచోట్ల హోర్డింగ్ లు విరిగిపడ్డాయి. చెట్లు నేలకూలాయి. దీంతో ద్విచక్ర వాహనాలు, కార్లు దెబ్బతిన్నాయి. ఆకాశంలో దట్టమైన మేఘాలు ఏర్పడటంతో ఐదుగంటలకే నగరంలోని రోడ్లన్నీ చీకటిమయంగా మారాయి. వర్షపు నీటితో నగరంలోని రోడ్లు జలమయంకావడంతో ట్రాఫిక్ కు అంతరాయం ఏర్పడింది. బంజారాహిల్స్ జీవీకే మాల్ వద్ద భారీగా ట్రాఫిక్ జామ్ అయ్యింది. బంజారాహిల్స్ వాటర్ ట్యాంక్ వద్ద పైప్ లైన్ పగిలిపోయింది. నీటి ఉధృతికి పలు వాహనాలు కొట్టుకుపోయాయి. ఆఫీసుల నుంచి ఇంటికి వెళ్లే సమయం కావడంతో నగరవాసులు తీవ్రంగా ఇబ్బందిపడ్డారు. నగరంలో పలుచోట్ల విద్యుత్ సరఫరాకు అంతరాయం ఏర్పడింది. ఉరుములు, మెరుపులు, బలమైన ఈదురుగాలతో భారీ వడగళ్ల వర్షం రావడం హైదరాబాద్ వాసులను కలవరానికి గురిచేసింది.