ఉరుకుల పరుగుల జీవితంలో చాలామంది తమ వ్యక్తిగత అవసరాలకు.. ఆరోగ్యానికి అంతగా ప్రాధాన్యత ఇవ్వట్లేదనే చెప్పాలి. పొద్దుట్నుంచి.. సాయంత్రం దాకా ఆఫీసు పనులు.. రాత్రులు పార్టీలు అంటూ.. అర్థరాత్రి దాటాక పడుకోవడం.. పొద్దునే లేచి మళ్లీ ఆఫీసుకు పరుగులంకించడం. దీంతో ఆరోగ్యానికి ఉపయోగపడే యోగాలు.. వ్యాయామం చేసే తీరిక జనాలకు లేకుండా పోతోంది. అందుకే ఓ సంస్థ విన్నూతంగా.. ఉద్యోగులు ఆఫీసులకు వెళ్లే సమయంలోనే బస్సుల్లో వ్యాయామం చేసేట్టుగా జిమ్‌ బస్సుల్ని రూపొందించింది.
లండన్‌కి చెందిన '1 రెబల్‌' అనే ఫిట్‌నెస్‌ సంస్థ ఈ జిమ్‌ బస్సుల్ని రూపొందించింది. ఈ బస్సులో జిమ్‌లో ఉండే అన్ని సదుపాయాలు ఏర్పాటు చేశారు. దీంతో జిమ్‌కి వెళ్లి ఎక్సర్‌సైజ్‌ చేసేంత సమయం లేని ఉద్యోగులు ఆఫీసుకు వెళ్తూనే జిమ్‌ చేయొచ్చు.
అయితే 45 నిమిషాల ప్రయాణానికి 12 నుంచి 15 పౌండ్లు ఛార్జ్‌ చేస్తారట. రోజువారీ పనులు చేసుకుంటూనే.. ఖాళీగా ప్రయాణించే సమయంలోనే ఆరోగ్యవంతమైన జీవితం పొందడానికి ఈ జిమ్‌ బస్సులు ఉపయోగపడతాయని సంస్థ ప్రతినిధులు చెబుతున్నారు. ప్రభుత్వం నుంచి అనుమతులు రాగానే లండన్‌లోని ప్రధాన రూట్లలో ఈ బస్సుల్ని అందుబాటులోకి తీసుకొస్తామంటున్నారు