‘డీజె టిల్లు’ ఏ స్థాయిలో సూపర్ హిట్ అందుకుందో ప్రత్యేకంగా చెప్పక్కర్లేదు. కోవిడ్ టైమ్‌లో వచ్చిన ఈ సినిమా వెల వెలబోతున్న బాక్సాఫీస్‌కి కళ తీసుకొచ్చిందనే చెప్పొచ్చు.

అయితే, ఈ సినిమాకి సీక్వెల్ రూపొందుతోన్న సంగతి తెలిసిందే. ఎప్పుడో ఆగస్ట్‌లో రిలీజ్ కావల్సి వుంది రెండో టిల్లు. అదేనండీ ‘టిల్లు స్క్వేర్’. మొదటి పార్ట్‌కి మించిన మసాలా దట్టించి ఈ రెండో పార్ట్‌ని అత్యంత శక్తివంతంగా రూపొందించబోతున్నామని చిత్ర యూనిట్ మొదట్లోనే తెలిపింది.

విదేశాల్లో ఈ సినిమా ఎక్కువ పార్ట్ షూటింగ్ జరుపుకుంది. అంతా బాగానే వుంది కానీ, అంచనాలున్నప్పటికీ ఈ సినిమా రిలీజ్ ఎందుకో వాయిదాల పర్వంలో నడుస్తోంది. ఆగస్ట్ అన్నారు కాలేదు. సెప్టెంబర్, అక్టోబర్, పోనీ డిశంబర్.. అది కూడా కాదు.. ఇప్పుడు ఫిబ్రవరి అంటున్నారు.

ఈ రగడపై కొంత అనుమానాలు వ్యక్తమవుతున్నాయ్. ఇదేమీ గ్రాఫిక్స్ సినిమా కాదు. సీజీ వర్క్ కారణంగా లేటవుతోందనుకోవడానికి. తాజాగా అందుతోన్న సమాచారం ప్రకారం సినిమా అవుట్ పుట్‌పై యూనిట్ అసంతృప్తికరంగా వుందట. అందుకే సన్నివేశాలు రీషూట్ జరుగుతోందట.

ఈ ఆలస్యానికి కారణం ఆ రీషూట్సే అని తెలుస్తోంది. అంతేకాదు, కథలోనూ కొన్ని కీలకమైన మార్పులు చేశారట. చూడాలి మరి, లేట్ అయినా లేటెస్ట్‌గా వచ్చి రెండో టిల్లుగాడు బాక్సాఫీస్ బద్దలు కొడతాడో లేదో.!