క్రికెట్‌ మైదానంలో తన ఆటతో ప్రేక్షకుల్ని మంత్రముగ్ధుల్ని చేసిన భారత క్రికెట్‌ దిగ్గజం సచిన్‌ తెందుల్కర్‌ బయోపిక్‌ 'సచిన్‌' చిత్రంపై సంగీత దర్శకుడు ఏఆర్‌ రెహ్మన్‌ పెదవి విప్పాడు. బాల్య దశ నుంచి క్రికెట్‌ దిగ్గజంగా తెందుల్కర్‌ ఎదిగిన క్రమాన్ని ఈ చిత్రం ద్వారా ప్రేక్షకుల ముందుకు తీసుకురాబోతున్నాం అని వివరించిన రెహ్మన్‌ ఇందులో క్రికెట్‌ అభిమానులు గతంలో సచిన్‌ జీవితం గురించి ఎన్నడూ వినని, చూడని అంశాలు కూడా ఉన్నాయని వెల్లడించాడు. 'క్రికెట్‌ దిగ్గజంగా చిత్రంలో సచిన్‌ ఎదిగిన క్రమానికి వినసొంపైన సంగీతాన్ని సమకూర్చాను. అందుకే ఈ సినిమా విడుదల కోసం ఆత్రుతగా ఎదురుచూస్తున్నాను. ఈ ఏడాది ఎక్కువ మంది వీక్షించేందుకు ఆసక్తి చూపుతున్న చిత్రం ఇదేనేమో' అని రెహ్మన్‌ అభిప్రాయపడ్డాడు. అయితే ఈ అందమైన చిత్రం ఇంకా తుది మెరుగులు దిద్దుకుంటోందన్నాడు.