ఒకప్పుడు హారర్ సినిమాలంటే గుండెల్లో గుబులు పుట్టేది. ఒక్కో హారర్ సీన్ వెంటాడేసేది. కానీ, ఇప్పుడు హారర్ మూవీస్‌కి అర్ధం మారిపోయింది. హారర్‌కి కామెడీ, బీభత్సమైన రొమాన్స్ జోడించి సరికొత్త క్రేజ్ క్రియేట్ చేస్తున్నారు మేకర్లు.

దాంతో, పిల్లా పెద్దా ఇష్టపడి ఈ జోనర్ మూవీస్‌ని తిలకిస్తున్నారు. అయితే, గతంలో మాదిరి అసలు సిసలు హారర్ సినిమాని చూపిస్తానంటున్నాడు హీరో శ్రీరామ్. ‘ఒకరికి ఒకరు’ సినిమాతో అప్పుడెప్పుడో తెలుగు ప్రేక్షకుల్ని మెప్పించిన ఈ హీరో, ఆ తర్వాత తమిళ డబ్బింగ్ సినిమాలతో ప్రేక్షకుల్ని అలరిస్తూ వస్తున్నాడు.

ఆయన నటించిన తాజా చిత్రమే ‘పిండం’. సాయి కిరణ్ దైదా దర్శకుడు. 1930, 1990, ప్రస్తుతం.. ఇలా మూడు కాలాలకు సంబంధించిన కథతో ఈ సినిమా తెరకెక్కింది.

ధియేటర్లలో ‘పిండం’ సినిమా చూసి సరికొత్త థ్రిల్ ఫీలవుతారు.. అని శ్రీరామ్ చెబుతున్నాడు. అయితే, ఈ మధ్య హారర్ సినిమాలకు అర్ధం మారిపోయింది. హారర్ అంటే ఖచ్చితంగా భయంగొలిపేలానే వుండాలి. అంతేకానీ, అందులో అనవసరమైన రొమాన్స్, కామెడీని బలవంతంగా ఇరికిస్తున్నారు. అది కరెక్ట్ కాదు. ఆ జోనర్‌ని కలుషితం చేసినట్లే.. అని శ్రీరామ్ వ్యాఖ్యానించారు.

ఈ శుక్రవారం అనగా డిశంబర్ 15న ‘పిండం’ ప్రేక్షకుల ముందుకు రానుంది. అవసరాల శ్రీనివాస్ ఈ సినిమాలో కీలక పాత్ర పోషించాడు. ప్రమోషన్లు గట్టిగా చేశారీ సినిమాకి. చూడాలి మరి, ఈ హారర్ మూవీ ఎంత మేర ప్రేక్షకుల్ని భయపెడుతుందో.!