హిమాచల్‌ప్రదేశ్‌లోని రాంపూర్‌ బుషాహర్‌ జిల్లాలో జరిగిన రోడ్డు ప్రమాదంలో స్వాతంత్య్ర సమరయోధుడు భగత్‌సింగ్‌ తోబుట్టువు మనవడు అభితేజ్‌ సింగ్‌ మృతిచెందారు. పోలీసులు తెలిపిన వివరాల ప్రకారం..27 ఏళ్ల అభితేజ్‌ స్పితిలోని తన ఇంటికి ద్విచక్రవాహనంపై వెళ్తుండగా బైక్‌ స్కిడ్‌ అయి కిందపడిపోయారు. దీంతో అతడి తలకు తీవ్ర గాయాలయ్యాయి. అభితేజ్‌ వెనుకే మరో కారులో వస్తున్న అతడి స్నేహితులు గుర్పాల్‌ సింగ్‌, అభితేశ్‌ అతడ్ని గమనించి రాంపూర్‌లోని ఆసుపత్రికి తరలించారు. చికిత్స పొందుతూ అభితేజ్‌ మృతిచెందినట్లు పోలీసులు తెలిపారు. అభితేజ్‌ తమ కుటుంబానికి ఒక్కడే కుమారుడని అతడి తండ్రి అభయ్‌ సంధు ఆవేదన వ్యక్తం చేశారు.అభితేజ్‌ మృతిపై దిల్లీ ముఖ్యమంత్రి అరవింద్‌ కేజ్రీవాల్‌ విచారం వ్యక్తం చేశారు. అతడి కుటుంబానికి సంతాపం తెలుపుతూ కేజ్రీవాల్‌ ట్వీట్‌ చేశారు.