నవరస నటనా సార్వభౌమ కైకాల సత్యనారాయణ కు ఇప్పుడు 81 ఏళ్ళు.. హాయిగా విశ్రాంతి తీసుకుంటూ గత కాలపు మంచి రోజుల్ని, తాను చేసిన గొప్ప పాత్రలను మళ్ళీ మళ్ళీ చూసుకుని శేషజీవితాన్ని సంతోషంగా గడిపేస్తున్నారు. దాదాపు 778 సినిమాల్లో నటించి మెప్పించిన కైకాల.. ఎస్వీఆర్, ఎన్టీఆర్ తర్వాత అంతటి మొనగాడనిపించుకున్న అద్భుత నటుడు. హీరోగా ప్రస్థానం మొదలెట్టి 13 సినిమాలు చేసి ఆ తర్వాత ప్రతినాయకుడిగా, కేరక్టర్ ఆర్టిస్టుగా స్థిరపడ్డ ఆయన ఒక్క ఎన్టీఆర్ తోనే 101 సినిమాలు విలన్ గా, విలక్షణ నటుడిగా నటించారు..కానీ ఒక్క పాత్ర మాత్రం చేయలేకపోయానన్న వ్యథ ఆయనలో మిగిలిపోయింది. అది .మూగ పాత్ర. సందర్భానుసారం ఒకట్రెండు చిత్రాల్లో మూగ సన్నివేశాల్లో యాక్ట్ చేసిన ఫుల్ లెంగ్త్ మూగ పాత్ర దక్కలేదన్న బాధ ఆయనలో అలానే ఉండిపోయింది. ఇదే విషయాన్ని ఆయన నిన్న హైదరాబాద్ లో ఢిల్లీ తెలుగు అకాడెమీ నిర్వహించిన ఓ సన్మాన సభలో చెప్పారు. సినీ జీవితం పూర్తి సంతృప్తి ఇచ్చిందని చెప్పుకొచ్చిన ఆయన .. ఇదంతా ప్రజల ఆశీర్వాదమన్నారు. ఎక్కడో గుడివాడలో పుట్టి, చిన్న చిన్న నాటకాలేసుకొనే తనను ఇంతటి గొప్ప కళాకారుడిగా తీర్చిదిద్దిన ఘనత నిజంగా నాటితరం మేటి టెక్నీషియన్లు, దర్శకులదేనన్నారు