రియాద్: ట్రక్కులు, బస్సుల ద్వారా జరిగే ట్రాఫిక్ ఉల్లంఘనలపై ఆటోమేటెడ్ నిఘాను ప్రారంభించినట్లు రవాణా జనరల్ అథారిటీ (TGA) ప్రకటించింది. ఇది రాజ్యంలో వివిధ ప్రాంతాలలో ఏప్రిల్ 21 నుండి అమలులోకి వస్తుందని తెలిపింది. ట్రక్కులు,  బస్సులలో కార్గో రవాణా, ట్రక్కు అద్దె, అంతర్జాతీయ రవాణా బస్సులు, అద్దె బస్సులు వీటి కిందకు వస్తాయని పేర్కొంది. ట్రాఫిక్ భద్రతను పెంపొందించడం, అధికారం ద్వారా నిర్దేశించిన నిబంధనలు మరియు సాంకేతిక అవసరాలకు అనుగుణంగా ట్రక్కులు, బస్సుల ఉల్లంఘనలను తగ్గించే లక్ష్యంతో కొత్త నిర్ణయం తీసుకున్నట్లు అథారిటీ తెలిపింది. అదే సమయంలో కార్బన్ ఉద్గారాల రేట్లను తగ్గించడానికి ఇది దోహదం చేస్తుందని పేర్కొంది. ఏప్రిల్ 21 నుండి ఆటోమేటిక్ నిఘాలో భాగంగా ఆపరేటింగ్ కార్డ్ పొందకుండా ట్రక్ లేదా బస్సును నడపడం, గడువు ముగిసిన కార్డ్‌తో ట్రక్ లేదా బస్సును నడపడం, అలాగే బస్సు లైఫ్ టైం ముగియడాన్ని కూడా పర్యవేక్షించే అవకాశం ఉందని తెలిపింది.