దేశ ఆర్థిక రాజధాని ముంబయి కొలబా ప్రాంతంలోని కాజ్‌వేలో గల ఓ భవనంలో గురువారం సాయంత్రం భారీ అగ్నిప్రమాదం సంభవించింది. భవనం పైభాగం నుంచి భారీగా అగ్నికీలలు ఎగసిపడుతున్నాయి. స్థానికుల సమాచారంతో 12 అగ్నిమాపక శకటాలు అక్కడికి చేరుకున్నాయి. సిబ్బంది మంటలను అదుపు చేసేందుకు తీవ్రంగా శ్రమిస్తున్నారు.
కొలబా ప్రాంతం జన సంచారం అధికంగా ఉండే ప్రాంతం. దుకాణ సముదాయాలతో పాటు, నివాస భవనాలు అక్కడ అధికంగానే ఉంటాయి. దీంతో కాజ్‌వేను మూసివేశారు. ముందు జాగ్రత్త చర్యగా అగ్నిప్రమాదం సంభవించిన ప్రాంతానికి సమీపంలో ఉన్న భవనాలను ఖాళీ చేయాలని అధికారులు ప్రజలకు సూచిస్తున్నారు.
ముంబయి డీసీపీ మనోజ్‌ శర్మ సంఘటనా స్థలంలో పరిస్థితులను సమీక్షిస్తున్నారు. భవనం నుంచి ఇప్పటి వరకు ఇద్దరిని సురక్షితంగా బయటకు తీసుకొచ్చినట్లు చెప్పారు.