'బాహుబలి-ది కన్‌క్లూజన్‌' చిత్రం క్లైమాక్స్‌ చిత్రీకరణ మొదలైంది. ఈ నెల 13 నుంచి 10 వారాల పాటు నిర్విరామంగా పతాక సన్నివేశాల చిత్రీకరణ జరపనున్నట్లు ఇటీవల తెలిపిన చిత్ర బృందం.. సోమవారం తెల్లవారుజాము నుంచి క్లైమాక్స్‌ షూట్‌ను ప్రారంభించినట్లు తమ ట్విట్టర్‌ ఖాతా ద్వారా తెలిపింది. సినిమా సెట్‌లో ఏం జరుగుతోందో తెలుసుకోవడానికి స్నాప్‌ చాట్‌లో ఫాలో అవమని ట్వీట్‌ చేసింది. చిత్ర హీరో ప్రభాస్‌, ప్రతినాయకుడు రానా సెట్‌లో దిగిన ఫొటోలతోపాటు దర్శకుడు ఎస్‌.ఎస్‌. రాజమౌళి యూనిట్‌ సభ్యులకు ఏదో వివరిస్తున్న ఫొటోను అభిమానులతో పంచుకున్నారు. గత ఏడాది విడుదలైన 'బాహుబలి-ది బిగినింగ్‌'కి కొనసాగింపుగా ఈ చిత్రాన్ని తెరకెక్కిస్తున్నారు.
ప్రభాస్‌, రానా, అనుష్క, తమన్నా, రమ్యకృష్ణ ఈ చిత్రంలో ప్రధాన తారాగణంగా నటిస్తున్న సంగతి తెలిసిందే.