మధ్యాహ్న సమయంలోనే కాకుండా, ఉదయం నుంచి సాయంత్రం వరకు ఎండ వేడిమి తీవ్రంగా ఉండటంతో సూర్యాస్తమయం తర్వాత పనిచేయడానికే ఔట్‌ డోర్‌లో పనిచేసే నిర్మాణ రంగ కార్మికులు ఆసక్తి చూపుతున్నారు. ఉదయం 11.30 గంటల నుంచి మధ్యాహ్నం 3 గంటల వరకు మిడ్‌ డే బ్రేక్‌ ఉన్నప్పటికీ, ఈ మూడున్నర గంటల్లో వేడిమిని తప్పించుకున్నా, అంతకు ముందు ఆ తర్వాత వేడి తమకు ఇబ్బందికరంగానే ఉందని వారు తెలిపారు. ఉదయం వేళల్లో కన్నా సూర్యాస్తమయం తర్వాత చేసే పని పట్ల ఎక్కువమంది ఆసక్తి చూపుతున్నారనీ, ఆ సమయంలో పని కూడా వేగంగా జరుగుతోందని, కొన్ని సంస్థలు ఇప్పటికే ప్రయోగాత్మకంగా రాత్రి 7 గంటల నుంచి తెల్లవారు ఝాము 4 గంటల వరకు పని దినాల్ని చేపట్టి విజయం సాధించాయని కన్‌స్ట్రక్షన్‌ రంగానికి చెందిన సీనియర్‌ ప్రాజెక్ట్‌ ఇంజనీర్‌ ఒకరు చెప్పారు. చాలా వరకు కార్మికులు రాత్రి వేళ పనిచేయడానికి నిరాకరించడంలేదు. షెల్టర్‌ నీడన పనిచేయాల్సి వచ్చినా వేడి ప్రభావంతో పని సామర్థ్యం తగ్గుతోందని నిపుణులు వివరిస్తున్నారు.