రియాద్: అమెరికా, రష్యాల మధ్య అతిపెద్ద ఖైదీల మార్పిడికి సహకరించినందుకు సౌదీ క్రౌన్ ప్రిన్స్,  ప్రధానమంత్రి మహమ్మద్ బిన్ సల్మాన్‌కు రష్యా అధ్యక్షుడు వ్లాదిమిర్ పుతిన్ కృతజ్ఞతలు తెలిపారు. అమెరికన్ జర్నలిస్ట్ ఇవాన్ గెర్ష్‌కోవిచ్, యుఎస్ మాజీ మెరైన్ పాల్ వీలన్ రష్యా నిర్బంధం నుండి విముక్తి పొందిన గంటల తర్వాత ఆగష్టు 1న యునైటెడ్ స్టేట్స్‌కు తిరిగి వచ్చారు.  ప్రచ్ఛన్న యుద్ధం తర్వాత రెండు దేశాల మధ్య అతిపెద్ద ఖైదీల మార్పిడిలో భాగంగా ఒక సంవత్సరానికి పైగా పూర్తి రహస్యంగా పనిచేసిన స్వాప్ ఒప్పందంలో 24 మంది ఖైదీలు విడుదలయ్యారు.  వీరిలో 16 మంది రష్యా నుండి వెళ్లగా, 8 మంది వెస్ట్రన్ కంట్రీస్ నుంచి రష్యాకు తిరిగొచ్చారు.

రష్యాలోని ఈస్టర్న్ ఎకనామిక్ ఫోరమ్ ఎన్ వ్లాడివోస్టాక్‌లో పుతిన్ ప్రసంగిస్తూ.. ఖైదీల మార్పిడికి సౌదీ అరేబియా క్రౌన్ ప్రిన్స్ చురుకైన పాత్ర పోషించారని, తమపౌరులు స్వదేశానికి తిరిగి రావడానికి తోడ్పాటు అందించినందుకు కృతజ్ఞులం అని ప్రకటించారు.  అలాగే చర్చల వేదికను ఏర్పాటు చేసిన టర్కీ అధ్యక్షుడు రెసెప్ తయ్యిప్ ఎర్డోగాన్‌కు కూడా పుతిన్ కృతజ్ఞతలు తెలిపారు.