మనామా: అల్ హూరా ప్రాంతంలోని నైట్‌క్లబ్ వద్ద జరిగిన హిట్ అండ్ రన్ కేసు కీలక మలుపు తిరిగింది. ఈ ఘటనకు సంబంధించి 24 సంవత్సరాల వయస్సు గల ఇద్దరు గల్ఫ్ జాతీయులను నిందితులుగా గుర్తించారు. ఆగస్టు 2న నిందితులు ఉద్దేశపూర్వకంగా నైట్ క్లబ్ సెక్యూరిటీ గార్డును చంపి, మరో ఇద్దరిని గాయపరిచారని పబ్లిక్ ప్రాసిక్యూషన్ ఆరోపించింది.

నైట్‌క్లబ్ మేనేజర్ వాంగ్మూలం ప్రకారం.. ఈ సంఘటన ఆగస్టు 1వ తేదీ రాత్రి 10 గంటల సమయంలో జరిగింది. ఇద్దరు నిందితులు మత్తులో హోటల్ నిబంధనలను ఉల్లంఘిస్తూ నైట్‌క్లబ్‌లోకి మద్యం తీసుకురావడానికి ప్రయత్నించారు. అడ్డుకున్న సెక్యూరిటీ సిబ్బందితో ఘర్షణ పడ్డారు. అనంతరం  తెల్లవారుజామున 1 గంటలకు తమ వాహనంతో నైట్‌క్లబ్ వెలుపల నిలబడి ఉన్న సెక్యూరిటీ గార్డులను ఢీకొట్టారు.ఇందులో ఒక గార్డు మరణించగా.. ఇద్దరు గార్డులకు తీవ్ర గాయాలయ్యాయి. ఈ సంఘటన తర్వాత నిందితులు కింగ్ ఫహద్ కాజ్‌వే మీదుగా బహ్రెయిన్‌ను విడిచి పారిపోయారు. ఈ సంఘటన జరిగిన 19 రోజుల తర్వాత నిందితులు తిరిగి రాజ్యానికి వచ్చారు. వారి కదలికలను ట్రాక్ చేస్తున్న పోలీసులు.. కింగ్ ఫహద్ కాజ్‌వే వద్ద అదుపులోకి తీసుకున్నారు. విచారణలో తాము చేసిన నేరాన్ని అంగీకరించారు. ఈ కేసు ప్రస్తుతం కోర్టులో ఉంది. నిందితులపై హత్య, హత్యాయత్నం వంటి తీవ్రమైన అభియోగాలను నమోదు చేశారు.