పవిత్ర రమదాన్ మాసంలో తమ దేశానికి వచ్చే టూరిస్టులకు నోరూరించే వార్త చెప్పింది దుబాయ్ టూరిజం డిపార్ట్‌మెంట్. చరిత్రలో తొలిసారిగా మద్యం అమ్మకాలపై ఉన్న నిబంధనలను సడలించింది. రమదాన్ మాసం ముగిసేవరకు పగలు కూడా మద్యం అమ్ముకోవచ్చని దేశంలోని హోటళ్లు, బార్లు, రెస్టారెంట్లకు అనుమతిచ్చింది. టూరిస్టులు, ఆల్కహాల్ ట్యాక్స్ తమ ఆదాయాన్ని భారీస్థాయిలో పెంచుతారని ఆశిస్తున్న అక్కడి టూరిజం డిపార్ట్‌మెంట్ విచ్చలవిడి మద్యం అమ్మకాలకు పచ్చజెండా ఊపింది. గతంలో ఎవరైనా మద్యం సేవించాలంటే సాయంత్రం వరకు ఆగాల్సిన పరిస్థితి ఉండేది. అయితే ఈ నెల రోజులు మాత్రం ఎప్పుడుపడితే అప్పుడు మందు అందుబాటులో ఉండనుంది. 
అయితే పవిత్ర రమదాన్ మాసంలో ఎవరి మనోభావాలు దెబ్బతినకుండా మసలుకోవాలని పర్యాటకులకు సూచించింది. రమదాన్ మాసం ముగిసేవరకు కనీసం పది లక్షల మంది టూరిస్టులు దుబాయ్ వస్తారని అక్కడి అధికారులు అంచనా వేస్తున్నారు. తమ పక్కనే ఉన్న సౌదీఅరేబియా, కువైట్‌, షార్జాల్లో మద్యం అమ్మకాలపై నిషేధం ఉండగా.. దుబాయ్‌లో మాత్రం ఉన్న నిబంధనలను కూడా సవరించడం ఆశ్చర్యం కలిగిస్తోంది. బీర్‌పై 30 శాతం మున్సిపాలిటీ ట్యాక్స్‌, మద్యంపై 50 శాతం దిగుమతి పన్నులాంటివి ఉండటంతో వీటి అమ్మకాలను పెంచడం ద్వారా భారీగా ఆదాయం సమకూర్చుకోవాలని దుబాయ్ భావిస్తోంది.