రియాద్: సౌదీ అరేబియాలో రాబోయే మూడు రోజులపాటు ఉరుములు, మెరుపులతో కూడిన భారీ వర్షాలు కొనసాగే అవకాశం ఉందని, అంతటా ప్రజలు అప్రమత్తంగా ఉండాలని జనరల్ డైరెక్టరేట్ ఆఫ్ సివిల్ డిఫెన్స్ కోరింది. సురక్షితమైన ప్రదేశాలలో ఉండాలని, వరదలు సంభవించే ప్రాంతాలు,లోయలకు దూరంగా ఉండాలని సూచించింది.

మక్కా,రియాద్ ప్రాంతాలలో మోస్తరు నుండి భారీ వర్షాలు కురుస్తాయని హెచ్చరించింది. తబుక్, మదీనా, అల్-జౌఫ్, నార్తర్న్ బోర్డర్స్, తూర్పు ప్రావిన్స్, హెయిల్, ఖాసిమ్, అల్-బహా మరియు అసిర్ ప్రాంతాలలో మోస్తరు నుండి భారీ వర్షాలు కురుస్తాయి. జాజాన్ ప్రాంతంలో తేలికపాటి నుండి మోస్తరు వర్షాలు కురుస్తాయి. నజ్రాన్ ప్రాంతంలో తేలికపాటి వర్షాలు కురుస్తాయని వెల్లడించింది.