యూఏఈ: డాక్టర్లకు యూఏఈ గుడ్ న్యూస్ చెప్పింది. క్రిటికల్ మెడికల్ స్పెషాలిటీలలో పనిచేస్తున్న 13 కేటగిరీల డాక్టర్లకు అంతర్గత మంత్రిత్వ శాఖ వినూత్న 'బిన్ వారికా' అత్యవసర సేవ కింద ప్రత్యేక ట్రాఫిక్ అధికారాలు మంజూరు చేశారు. ఇది చట్టబద్ధమైన వేగ పరిమితి కంటే గంటకు 40 కి.మీ. ఎక్కువ వేగంతో నడపడానికి, రోడ్ షోల్డర్‌ను ఉపయోగించడానికి, అత్యవసర కాల్‌లకు ప్రతిస్పందించేటప్పుడు ట్రాఫిక్ పెట్రోల్‌ల నుండి రియల్ టైమ్ మద్దతును పొందడానికి వీలు కల్పిస్తుంది.

ఒక ఆసుపత్రి అత్యవసర హెచ్చరికను జారీ చేయగానే, యాప్ ద్వారా సేవను యాక్టివేట్ చేయాలి. మంత్రిత్వ శాఖ ఆపరేషన్స్ టీమ్ వారి మార్గాన్ని రియల్ టైమ్ లో పర్యవేక్షించడం ప్రారంభిస్తుంది. సురక్షితంగా ప్రయాణించడానికి వీలుగా వారి వాహనంలో ప్రత్యేక త్రిభుజాకార టాబ్లెట్ పరికరాన్ని కూడా ఇన్‌స్టాల్ చేయాలి.

ఈ చొరవను జూలై 2020లో ఉప ప్రధాన మంత్రి, అంతర్గత మంత్రి లెఫ్టినెంట్ జనరల్ షేక్ సైఫ్ బిన్ జాయెద్ అల్ నహ్యాన్ అధికారికంగా ప్రారంభించారు.  మంత్రిత్వ శాఖ స్మార్ట్ అప్లికేషన్ ద్వారా అందుబాటులో ఉన్న ఈ సేవ, అత్యవసర పరిస్థితుల్లో డాక్టర్లు వారి కార్యాలయాలకు సురక్షితంగా, ఎలాంటి అడ్డంకులు లేకుండా వేగంగా ప్రయాణించడానికి వీలు కల్పిస్తుంది. ఇది పేషంట్ ప్రాణాలను కాపాడటానికి, ఫ్రంట్‌లైన్ ఆరోగ్య సంరక్షణ ప్రతిస్పందనకు మద్దతు ఇవ్వడానికి కీలకమైన ప్రయత్నమని అంతర్గత వ్యవహారాల మంత్రిత్వ శాఖలోని సేవా అభివృద్ధి విభాగం డైరెక్టర్ కల్నల్ డాక్టర్ సయీద్ మొహమ్మద్ అల్-ధహౌరి పేర్కొన్నారు.        

"మేము ఇప్పటికే ప్రతిస్పందన సమయాలను 30 శాతం తగ్గించాము. డాక్టర్ల నుండి వచ్చిన అభిప్రాయాల ఆధారంగా మేము సేవను నిరంతరం మెరుగుపరుస్తున్నాము" అని అల్-ధహౌరి అన్నారు.