దుబాయ్‌ మెరిటైమ్‌ సిటీ అథారిటీ, స్మార్ట్‌ వెదర్‌ అనే మొబైల్‌ ఫ్రెండ్లీ ఆన్‌లైన్‌ పోర్టల్‌ని ప్రారంభించింది. ఈ పోర్టల్‌లో వాతావరణానికి సంబంధించిన సమాచారాన్ని, అలాగే పౌరులకు పలు సూచనలు, సలహాల్ని ఇచ్చేలా ఏర్పాట్లు చేశారు. డిఎంసిఎ ఇన్ఫర్మేషనల్‌ టెక్నాలజీ డిపార్ట్‌మెంట్‌ డైరెక్టర్‌ మహమౌద్‌ ఎవిదా మాట్లాడుతూ, వాతావరణంపై ఎప్పటికప్పుడు పౌరులకు సమాచారం అందించేలా అత్యాధునిక సాంకేతిక పరిజ్ఞానాన్ని వినియోగించి ఈ పోర్టల్‌ తయారు చేసినట్లు చెప్పారు. ఆఫ్‌ షోర్‌ మరియు ఆన్‌ షోర్‌ వెదర్‌ స్టేటస్‌ని, అలాగే ముందస్తు వాతావరణ హెచ్చరికల్ని, సమాచారాన్ని అందజేస్తుందని, తొమ్మిది రోజుల ముందుగా ఈ సమాచారాన్ని అందించగలిగేలా వెబ్‌ పోర్టల్‌లో ఏర్పాట్లు చేశామని తెలిపారాయన. సముద్రం అల్లకల్లోలంగా ఉండే అవకాశాల్నీ, సాధారణ స్థితిని కూడా ఈ వెబ్‌ పోర్టల్‌ ద్వారా తెలుసుకోవచ్చు. ప్రొఫెషనల్‌ అలాగే పబ్లిక్‌ వెర్షన్లలో ఈ పోర్టల్‌ అందుబాటులో ఉంటుంది.