అమెరికా: అమెరికా రాజకీయాల్లో ఊహించని పరిణామం చోటుచేసుకుంది. టెస్లా, స్పేస్‌ఎక్స్‌ వంటి ప్రపంచ ప్రఖ్యాత కంపెనీల సీఈవో ఎలాన్ మస్క్. ఇప్పుడు రాజకీయ రంగంలోకి అడుగుపెట్టారు. అమెరికాలో స్థిరంగా కొనసాగుతున్న రిపబ్లికన్, డెమొక్రాట్ పార్టీలకు ప్రత్యామ్నాయంగా ‘అమెరికా పార్టీ’ను ప్రారంభిస్తున్నట్టు ప్రకటించారు.ఆయన తన సోషల్ మీడియా వేదిక ‘ఎక్స్’ ద్వారా ఈ విషయాన్ని వెల్లడించారు. ప్రజల స్వేచ్ఛను తిరిగి ఇవ్వాలనే ఉద్దేశంతోనే ఈరోజు ‘అమెరికా పార్టీ’ని స్థాపిస్తున్నాం. దేశాన్ని అవినీతి, దుర్వినియోగం దెబ్బతీస్తోంది. ఇది రెండు పార్టీల మధ్య పోటీ అనిపించినా, వాస్తవానికి మనం ఏకపార్టీ వ్యవస్థలోనే ఉన్నాం, అని మస్క్ తన పోస్ట్‌లో పేర్కొన్నారు.మస్క్ రాజకీయ ప్రకటన అనంతరం అమెరికా స్టాక్ మార్కెట్‌లో ఆసక్తికర పరిణామాలు చోటుచేసుకున్నాయి. ప్రీ-మార్కెట్ ట్రేడింగ్ ప్రారంభమైన వెంటనే టెస్లా షేరు ధరలు గణనీయంగా పడిపోయాయి. గతవారం ముగిసే సమయానికి షేరు ధర $315.35 ఉండగా, ప్రీ-మార్కెట్‌లో అది $291.96కి పడిపోయింది.ఇన్వెస్టర్లలో మస్క్ కొత్త పార్టీ వల్ల టెస్లా మీద ప్రభావం ఉంటుందన్న భయం మొదలైంది. వ్యాపార లక్ష్యాల పక్కన పెట్టి రాజకీయాల వైపు వెళ్లడం నష్టాలను పెంచే అవకాశం ఉందని నిపుణులు హెచ్చరిస్తున్నారు.

ఇప్పటి వరకు టెస్లా షేర్లకు పడిపోయిన వాస్తవాలు
ఈ ఏడాది ప్రారంభం నుంచి ఇప్పటివరకు టెస్లా షేరు విలువ 16.86 శాతం తగ్గింది. గత ఐదేళ్లలో టెస్లా పెట్టుబడిదారులకు మంచి లాభాలు తెచ్చిపెట్టింది. అయితే, మస్క్ తాజా రాజకీయ అడుగుతో మార్కెట్‌లో భయం పెరిగింది. కంపెనీ దృష్టిని రాజకీయాలవైపు మళ్లించడమంటే, వ్యాపారంపై నష్టభారం పడే అవకాశం ఎక్కువగా ఉన్నదన్న అభిప్రాయాలు వినిపిస్తున్నాయి.

ట్రంప్‌తో విభేదాలు – మస్క్ రాజకీయ మార్గం
పురోగమన ఆలోచనలతో నిలబడే మస్క్… గతకొంతకాలంగా డొనాల్డ్ ట్రంప్‌తో అనేక అంశాల్లో విభేదిస్తున్నారు. అటు బైడెన్ పాలన పట్ల కూడా ఆయన అసంతృప్తిగా ఉన్నారు. ఇలాంటి సమయంలో ‘అమెరికా పార్టీ’ అనే కొత్త రాజకీయ వేదిక ఆయన ప్రకటించడం వెనుక విస్తృత వ్యూహం ఉన్నట్లు కనిపిస్తోంది.

రాజకీయ ప్రవేశం టెక్ ప్రపంచాన్ని కుదిపేస్తుందా?
ప్రపంచంలో అత్యంత ప్రభావవంతమైన టెక్ లీడర్一అయిన ఎలాన్ మస్క్, ఇప్పుడు రాజకీయాల్లోకి అడుగుపెట్టడంపై పలు వర్గాల్లో ఆసక్తికర చర్చలు మొదలయ్యాయి. టెస్లా, స్పేస్‌ఎక్స్, న్యూరాలింక్ వంటి కంపెనీలను ముందుకు నడిపిస్తున్న మస్క్‌కు రాజకీయ భాద్యతలు మేనేజ్ చేయగలరా? అనే ప్రశ్నలు వినిపిస్తున్నాయి.అంతేకాక, ఆయన రాజకీయ వ్యవస్థపై ఎలాంటి ప్రభావం చూపగలరు? కొత్త పార్టీ ప్రజల్లో విశ్వాసాన్ని కలిగించగలదా? అనే అంశాలు కూడా చర్చనీయాంశమయ్యాయి. అమెరికాలో మూడో పార్టీకి స్దానం ఏర్పడటమే కష్టమన్న వాదనల మధ్య, మస్క్ ప్రయోగం ఏమేరకు సఫలం అవుతుందన్నది ఆసక్తికరంగా మారింది.