గోవా గవర్నర్‌గా కేంద్ర మాజీ మంత్రి అశోక్ గజపతిరాజు నియామకం సందర్భంగా హోంమంత్రి అనిత ఆయనను మర్యాద పూర్వకంగా కలిశారు.విజయనగరంలో ఉన్న అశోక్ గజపతిరాజు నివాసానికి వెళ్లిన మంత్రి అనిత, ఆయనకు శుభాకాంక్షలు తెలియజేశారు.ఈ సందర్భంగా ఆమె మాట్లాడుతూ అశోక్ గజపతిరాజు గవర్నర్‌గా నియమితులవడం గర్వకారణమని పేర్కొన్నారు.

జిల్లా ప్రజల పట్ల ఆయన సేవలు చిరస్మరణీయం

50 ఏళ్లకు పైగా విజయనగరం జిల్లాలో అశోక్ గజపతిరాజు అందించిన సేవలు ప్రశంసనీయమని హోంమంత్రి అనిత (Anitha) గుర్తుచేశారు. ప్రజా జీవితంలో ఉన్నప్పటికీ ఆయనపై ఎలాంటి ఆరోపణలు లేవని, సుశీల రాజకీయ నాయకుడిగా అందరికీ ఆదర్శంగా నిలిచారని కొనియాడారు. నిజాయితీకి, విలువలకు నిలువెత్తు ప్రతీకగా అశోక్ గజపతిరాజు పేరుపొందారని ఆమె అన్నారు.

సామాజిక సేవకు గుర్తింపు లభించడం గర్వకారణం

అలాంటి గొప్ప నాయకుడికి గవర్నర్ పదవిలా గౌరవప్రదమైన బాధ్యత దక్కడం ఎంతో సంతోషకరమని హోంమంత్రి అనిత అన్నారు. ఇది విజయనగరం ప్రజలందరికీ గర్వకారణమని పేర్కొన్నారు. భవిష్యత్తులో ఆయన సేవలు మరింత విస్తృతంగా దేశానికి ఉపయోగపడాలని ఆమె ఆకాంక్షించారు.